چیف آف آرمی اسٹاف فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی، چیف آف ایئر اسٹاف، چیف آف نیول اسٹاف اور پاکستان کی مسلح افواج کی جانب سے کیپٹن کرنل شیر خان شہید، نشانِ حیدر کو ان کی 26ویں برسی پر دل کی گہرائیوں سے خراجِ عقیدت پیش کیا ہے۔
آئی ایس پی آر کی جانب سے بیان میں کہا گیا ہے کہ 1999 کی کارگل جنگ کے دوران کیپٹن کرنل شیر خان شہید نے بے مثال جرأت اور وطن سے محبت کا مظاہرہ کرتے ہوئے مادرِ وطن کے دفاع میں اپنی جان کا نذرانہ پیش کیا۔ وہ پاکستان کی مسلح افواج اور پوری قوم کے لیے حوصلے اور عزم کی ایک روشن علامت ہیں۔
یہ بھی پڑھیے: پاک فوج کے زیراہتمام کیپٹن کرنل شیر خان کے مزار کی تعمیر و تزئین و آرائش مکمل
آئی ایس پی آر کے مطابق نامساعد حالات میں ان کی شجاعت، قیادت اور فرض شناسی پاک فوج کی اعلیٰ روایات کی عکاس ہیں۔ انہوں نے فرنٹ لائن پر دشمن کا مقابلہ کرتے ہوئے غیر معمولی بہادری دکھائی اور وطن کے دفاع میں اپنی جان قربان کی۔
بیان میں کہا گیا ہے کہ کیپٹن کرنل شیر خان شہید کی عظیم قربانی، پاکستان کی مسلح افواج کی اس جذبۂ قربانی اور فرض شناسی کی آئینہ دار ہے جو ان کے کردار کا حصہ ہے۔ ان کی شجاعت اور حب الوطنی آج بھی قوم کے دلوں میں زندہ ہے اور آنے والی نسلوں کے لیے مشعلِ راہ ہے۔ ہم اپنے اس عظیم ہیرو کو سلام پیش کرتے ہیں اور اس عزم کا اعادہ کرتے ہیں کہ وطنِ عزیز کے دفاع کے لیے ہر قیمت چکائیں گے۔
یہ بھی پڑھیے: کرنل شیر خان شہید ہوئے تو بھارتی کمانڈر نے انہیں کیوں سیلوٹ کیا؟
اس دن کے موقع پر مسلح افواج، وفاداری، جرأت اور عزت و وقار جیسے اعلیٰ اقدار کو اپنانے کے عہد کی تجدید کرتی ہیں جن کا عملی مظاہرہ کیپٹن کرنل شیر خان شہید نے کیا۔
