سارک چیمبر آف کامرس اینڈ انڈسٹری کے صدر افتخار علی ملک نے کہا ہے کہ پاکستان کو طرز حکمرانی، اقتصادی ترقی اور خارجہ تعلقات کے حوالے سے اپنی سوچ میں بنیادی تبدیلی کی ضرورت ہے۔
انہوں نے تاجروں کے ایک وفد سے گفتگو کرتے ہوئے کہا کہ پاکستان کو سیاسی عدم استحکام، کرپشن، غربت اور دہشت گردی جیسے چیلنجز کا سامنا ہے۔
ان کا کہنا تھا کہ معاشی تحفظ ہر ریاست کی بنیادی ضرورت ہے اس لیے ہمیں اپنے ہمسایہ ممالک کے ساتھ تعلقات کو مضبوط بنانا ہو گا۔
افتخار علی ملک نے کہا کہ سارک اور ای سی او جیسی علاقائی تنظیموں کے ساتھ پائیدار معاشی تعلقات کو فروغ دے کر ڈیفالٹ کے منڈلاتے خطرے کو دور کرنا ہو گا، پاکستان کو اپنی روایتی سوچ سے ہٹ کر مسائل سے نمٹنے کے لیے جمہوری استحکام، میرٹ کی بنیاد پر تقرریوں، تعلیم و صحت، معاشی ترقی، روزگار کے مواقع اور ہمسایہ ممالک کے ساتھ بہتر تعلقات کی ضرورت ہے۔
انہوں نے کہا کہ پاکستان کی معاشی بدحالی کی وجوہات کچھ بھی ہوں اسے اپنی بقا اور موجودہ بحران سے نکلنے کے لیے اپنی ترجیحات پر نظرثانی کرنا ہو گی۔
ان کا کہنا تھا کہ پاکستان کی معیشت 1970 تک بھارت سے بہتر تھی جو نامناسب فیصلوں کی وجہ سے آہستہ آہستہ تنزلی کا شکار ہوتی رہی اور اب منظر نامہ یکسر بدل گیا ہے۔
انہوں نے مزید کہا کہ ڈیجیٹل اور خلائی ٹیکنالوجی، مصنوعی ذہانت جیسے شعبے اقتصادی ترقی کی بنیاد بن رہے ہیں، بدلتے ہوئے عالمی اقتصادی منظر نامے کی روشنی میں پاکستان کو بھی اپنی پالیسیوں میں بنیادی تبدیلیاں لانا ہوں گی اور جنوب ایشیائی ممالک میں بھارت کے بڑھتے ہوئے اثر و رسوخ کی مزاحمت کے لیے مکمل یکجہتی کا مظاہرہ کرنا ہو گا۔
