سعودی وزارت داخلہ کے سیکیورٹی ترجمان کرنل طلال بن شلہوب نے بتایا کہ مناسکِ حج کے دوران حجاج کرام کی مقدس مقامات کے سفر کی تکمیل اور طوافِ افاضہ و رمیِ جمرہ عقبہ کے بعد منیٰ واپسی بحفاظت اور پُرسکون ماحول میں کامیابی سے مکمل ہوگئی ہے۔
یہ بات انہوں نے حج میڈیا آپریشن سینٹر میں منعقدہ مشترکہ پریس بریفنگ کے دوران کہی، جس میں وزارت داخلہ، حج وعمرہ، صحت، اور ٹرانسپورٹ ولاجسٹک سروسز کے ترجمانوں نے بھی شرکت کی۔
یہ بھی پڑھیے: بہتر حج انتظامات، گرمی سے متاثرہ عازمین کی تعداد میں 90 فیصد کمی ریکارڈ
کرنل طلال بن شلہوب نے کہا کہ حج سیکیورٹی فورسز ضیوفِ الرحمن کے تحفظ اور مناسک کی ادائیگی کے دوران اُن کی سلامتی کو یقینی بنانے کے لئے اپنے فرائض بخوبی انجام دے رہی ہیں۔ اس دوران 436 غیر قانونی حج گروہ پکڑے گئے اور ویزہ قوانین کی خلاف ورزی کرنے والوں کو نکال دیا گیا۔
انہوں نے ایسے حجاج کرام جو ایامِ تشریق کے دوسرے دن جلد روانہ ہونا چاہتے ہیں، سے اپیل کی کہ وہ مقررہ وقت تک اپنے خیموں میں ہی قیام کریں تاکہ نظام اور سب کی سلامتی برقرار رہے۔
