راولپنڈی کے علاقے غازی آباد کے رہائشی اور ہائیکورٹ کے وکیل محمد انوار ڈار نے تھانہ آر اے بازار میں پھیری والوں اور ریڑھی بانوں کی جانب سے لاؤڈ اسپیکر کے بے جا اور غیر قانونی استعمال کے خلاف تحریری درخواست جمع کرا دی۔
یہ بھی پڑھیں: کاشانہ ویلفیئر ہوم کی سابقہ سپرنٹنڈنٹ افشاں لطیف ریڑھی لگانے پر مجبور
درخواست گزار نے مؤقف اختیار کیا کہ وہ صحت کے مسائل کا شکار ہیں اور ان سمیت علاقے کے دیگر بیمار، بزرگ شہری اور طلبہ شدید پریشانی کا سامنا کر رہے ہیں۔
ان کے مطابق مختلف اشیائے خورونوش فروخت کرنے والے، چھلی ریت والے، قلفی فروش، آئس کریم فروش، سبزی و پھل فروش اور دیگر ریڑھی بان روزانہ میگا فون اور لاؤڈ اسپیکر کا غیر قانونی استعمال کرتے ہیں۔
محمد انوار ڈار نے بتایا کہ اس سے قبل بھی متعدد بار متعلقہ حکام کو درخواستیں دی جا چکی ہیں، تاہم کوئی عملی اقدام نہیں کیا گیا۔
ان کا کہنا تھا کہ یہ عمل قابل دست اندازی پولیس جرم ہے، لیکن اس کے باوجود قانون نافذ کرنے والے ادارے حرکت میں نہیں آ رہے۔
یہ بھی پڑھیں: سارا دن ٹھیلا چلا کر شام کو 500 کا منہ دیکھتا ہوں، 12 ہزار کا بل کیسے دوں؟ پاکستانی ریڑھی بان کا شکوہ
انہوں نے پولیس سے مطالبہ کیاکہ ان پھیری والوں کے خلاف فوری کارروائی عمل میں لائی جائے تاکہ شہریوں کو اس اذیت ناک صورتحال سے نجات مل سکے۔
