عمران خان کی اسلام آباد ہائیکورٹ میں پیشی: لاہور سے روانہ ہو گئے

سابق وزیراعظم عمران خان زمان پارک لاہور سے اسلام آباد کے لیے روانہ ہو گئے ہیں، وہ آج اسلام آباد ہائیکورٹ میں پیش ہوں گے۔ چیئرمین پی ٹی آئی محسن شاہنواز پر حملہ کیس اور عسکری قیادت کے خلاف بیان پر درج مقدمات میں عبوری ضمانت کے لیے پیش ہوں گے۔ کیس کی سماعت اسلام آباد ہائیکورٹ کے چیف جسٹس عامر فاروق کریں گے۔ عدالت نے 2 مقدمات میں عمران خان کی 9 مئی تک عبوری ضمانت منظور کی تھی۔

عمران خان کے خلاف محسن شاہنواز پر حملے کا مقدمہ تھانہ سیکریٹریٹ جبکہ عسکری قیادت کے خلاف بیان کا مقدمہ تھانہ رمنا میں درج کیا گیا تھا۔

عمران خان کی پیشی: رجسٹرار اسلام آباد ہائیکورٹ کا سرکلر جاری

رجسٹرار اسلام آباد ہائیکورٹ کے جاری سرکلر کے مطابق عمران خان کی پیشی کے تناظر میں اسلام آباد ہائیکورٹ نے آئی جی پولیس اور ضلع انتظامیہ کو ہائیکورٹ کے ارد گرد سخت سیکیورٹی انتظامات کرنے کی ہدایت کی ہے۔ عمران خان کی 2 مقدمات میں عبوری ضمانت پر سماعت آج دن 2:30 بجے ہوگی۔

کورٹ روم نمبر 1 میں وکلاء اور صحافیوں کا داخلہ خصوصی پاس کے ذریعے ہوگا، اسلام آباد ہائیکورٹ کے ملازمین، عدالتی عملہ خصوصی پاس سے مستثنیٰ ہوں گے ۔ عمران خان کے ساتھ 15 وکلاء کو کمرہ عدالت جانے کی اجازت ہوگی۔

اٹارنی جنرل اور ایڈووکیٹ جنرل آفس سے 10 وکلاء کمرہ عدالت جا سکیں گے، اسلام آباد ہائیکورٹ جرنلسٹس ایسوسی ایشن کے 30 ممبران کو کمرہ عدالت میں جانے کی اجازت ہوگی، انتظامیہ کو خصوصی پاس اور ڈیپارٹمنٹل کارڈ ہونے والوں کو احاطہ عدالت میں داخلے سے نہ روکنے کی ہدایت بھی کی گئی ہے۔ خصوصی پاسز رکھنے والے افراد کو کمرہ عدالت نمبر ایک میں جانے کی اجازت ہوگی۔

اسلام آباد میں دفعہ 144 نافذ ہے، کسی بھی قسم کا اجتماع غیر قانونی ہوگا: ترجمان اسلام آباد پولیس

عمران خان کی اسلام آباد ہائیکورٹ پیشی کے تناظر میں ترجمان اسلام آباد پولیس نے اپنے ٹویٹ پیغام میں کہا ہے کہ اسلام آباد میں دفعہ 144 نافذ العمل ہے۔ کسی بھی قسم کا اجتماع غیر قانونی ہوگا۔ امن و عامہ کے پیش نظر جی ٹین پراجیکٹ موڑ اور عون محمد رضوی روڈ آمد و رفت کے لیے بند رہے گی۔

ترجمان اسلام آباد کیپیٹل پولیس

عمران خان کی اسلام آباد ہائی کورٹ پیشی۔

اسلام آباد میں دفعہ 144 نافذ العمل ہے۔

کسی بھی قسم کا اجتماع غیر قانونی ہوگا۔

امن و عامہ کے پیش نظر جی ٹین پراجیکٹ موڑ اور عون محمد رضوی روڈ آمدورفت کےلیے بند رہے گی۔

شہری دوران سفر متبادل راستوں کا…

— Islamabad Police (@ICT_Police) May 9, 2023