پاکستان تحریک انصاف کے وائس چیئرمین شاہ محمود قریشی نے کہا ہے کہ تحریک انصاف کا جھنڈا صبح عمران خان پاس تھا، اب میرے ہاتھ میں ہے۔ عمران خان کی گرفتاری من گھڑت سیاسی مقدمہ اور انتقامی کارروائی ہے۔
پاکستان تحریک انصاف کے وائس چیئرمین کی زیر صدارت تحریک انصاف کی سینئر قیادت کے ہنگامی اجلاس میں ہائی کورٹ کے فیصلے کو آج سپریم کورٹ میں چیلنج کرنے کا فیصلہ کیا گیا ہے۔
شاہ محمود قریشی نے کہا ہے کہ عمران خان کی رہائی کا مطالبہ جائز ہے، یہ من گھڑت سیاسی مقدمہ اور انتقامی کارروائی ہے۔ سیاسی اور قانونی انداز میں اس کا مقابلہ کریں گے۔
انہوں نے مزید کہا کہ آج نیب کورٹ میں سینئر لیڈر شپ عمران خان سے ملاقات کرے گی اور پر امن احتجاج قانونی اور آئینی حق ہے۔
تحریک انصاف کا جھنڈا اب میرے ہاتھ میں ہے، شاہ محمود قریشی
گزشتہ روز تحریک انصاف کے وائس چیئرمین نے آئیندہ کے لائحہ عمل پر غور کرنے کے لیے اسلام آباد میں پارٹی کی 6 رکنی کمیٹی کا اجلاس بلا یا تھا۔ انہوں نے کہا تھا کہ تحریک انصاف کا جھنڈا صبح عمران خان پاس تھا، اب میرے ہاتھ میں ہے اور اگر میری گرفتاری کا بھی منصوبہ ہے تو یہ جھنڈا کسی اور کے ہاتھ میں چلا جائے گا۔
شاہ محمود کا کہنا تھا کہ عوام کو اس امپورٹڈ حکومت اور چور ٹولے کے خلاف باہر نکل کر مقابلہ کرنا ہوگا۔
وائس چیئرمین پی ٹی آئی نے کہا کہ ہم نے کسی پر حملہ نہیں کرنا۔ پر امن طریقے سے اپنی جدوجہد کو آگے بڑھانا ہے۔
شاہ محمود قریشی کا کہنا تھا کہ ہمارا فوج سے کوئی جھگڑا نہیں کیوں کہ فوج ہماری اپنی ہے۔ ہم صرف یہ کہہ رہے ہیں کہ پی ڈی ایم سرکار کا یہ ٹولہ کیا کر رہا ہے۔
