اقوام متحدہ کے ایک اعلیٰ عہدیدار نے اتوار کو سلامتی کونسل کو خبردار کیا ہے کہ اسرائیل کا غزہ سٹی پر کنٹرول کا منصوبہ ایک اور المیے کو جنم دے سکتا ہے، جس کے دور رس نتائج برآمد ہوں گے، یہ انتباہ ایسے وقت میں سامنے آیا ہے جب اسرائیلی وزیر اعظم بینجمن نیتن یاہو نے دعویٰ کیا ہے کہ ان کا مقصد علاقے پر قبضہ کرنا نہیں۔
سلامتی کونسل کا یہ غیر معمولی ہنگامی اجلاس اس وقت بلایا گیا جب اسرائیل نے اعلان کیا کہ اس کی فوج غزہ سٹی کا کنٹرول سنبھالے گی، اس فیصلے کو نیتن یاہو کی سیکیورٹی کابینہ کی منظوری ملی، مگر عالمی سطح پر اس پر شدید تنقید ہوئی۔
یہ بھی پڑھیں:غزہ پر اسرائیلی قبضے کا اعلان، اقوام متحدہ کی سلامتی کونسل کا ہنگامی اجلاس جاری
اقوام متحدہ کے اسسٹنٹ سیکریٹری جنرل میروسلاو جینچا نے اجلاس میں کہا کہ اگر یہ منصوبے نافذ ہوئے تو یہ غزہ میں ایک اور تباہی کو جنم دیں گے، جو پورے خطے کو متاثر کرے گی اور مزید جبری بے دخلی، ہلاکتوں اور تباہی کا باعث بنے گی۔
سلووینیا کے اقوام متحدہ میں سفیر سیموئل زبوگار نے، یورپی رکن ممالک کی نمائندگی کرتے ہوئے، کہا کہ یہ فیصلہ نہ صرف یرغمالیوں کی واپسی کو یقینی بنانے میں ناکام رہے گا بلکہ ان کی جانوں کو مزید خطرے میں ڈالے گا۔ ان کے مطابق، یہ اقدام غزہ میں پہلے سے موجود بدترین انسانی بحران کو اور بڑھا دے گا اور فلسطینی شہریوں کی مزید اموات اور بڑے پیمانے پر نقل مکانی کا باعث بنے گا۔
مزید پڑھیں:غزہ میں امداد کی تقسیم کے دوران اسرائیلی حملے، اقوام متحدہ نے تحقیقات کا مطالبہ کردیا
اسرائیلی وزیر اعظم نیتن یاہو نے اتوار کو کہا کہ اسرائیل مختصر مدت کے منصوبے پر کام کر رہا ہے کیونکہ وہ جنگ کو ختم کرنا چاہتا ہے، انہوں نے کہا کہ اسرائیل غزہ پر قبضہ نہیں کرنا چاہتا۔
اقوام متحدہ میں فلسطینی سفیر ریاض منصور نے جمعہ کو کہا کہ اسرائیلی حکومت کی یہ کشیدگی عالمی برادری کی خواہشات کے بالکل منافی ہے۔
امریکی حمایت کے پیشِ نظر، جو سلامتی کونسل کا مستقل رکن ہے، امکان ہے کہ اسرائیل کو کسی عملی اقوام متحدہ کی مذمت سے بچا لیا جائے گا۔
اقوام متحدہ میں اسرائیلی سفیر ڈینی ڈینن نے اجلاس سے پہلے کہا کہ اسرائیل تمام یرغمالیوں کی رہائی تک جنگ نہیں روکے گا اور اپنے شہریوں کی حفاظت اور سلامتی کو یقینی بنانا اس کا فرض ہے۔
