پاکستان اسٹاک ایکسچینج میں منگل کے روز بھی تیزی کا رجحان برقرار رہا، جہاں کے ایس ای 100 انڈیکس کاروبار کے ابتدائی اوقات میں 900 سے زائد پوائنٹس بڑھ گیا، صبح 10 بج کر 55 منٹ پر انڈیکس 147,845.28 کی سطح پر تھا، جو 915.44 پوائنٹس یا 0.62 فیصد کا اضافہ ظاہر کرتا ہے۔
کاروباری سرگرمیوں میں گاڑیاں تیار کرنے والی کمپنیوں، کمرشل بینکوں، تیل و گیس کی تلاش کرنے والی کمپنیوں اور آئل مارکیٹنگ کمپنیوں میں نمایاں خریداری دیکھی گئی، انڈیکس میں نمایاں وزن رکھنے والے حصص جیسے ایم اے آر آئی، پی او ایل، پی ایس او، ایس ایس جی سی، ایس این جی پی ایل، ایچ بی ایل، ایم سی بی، میزان بینک اور یو بی ایل سبز زون میں رہے۔
یہ بھی پڑھیں: پاکستان اسٹاک ایکسچینج نئی بلندیوں پر، تیزی کا طوفان مسلسل جاری
ماہرین کے مطابق سرمایہ کاروں کا اعتماد بہتر کارپوریٹ منافع اور پاکستان کے توانائی کے شعبے میں متوقع امریکی سرمایہ کاری کی خبروں کے باعث بڑھا ہے، گزشتہ روز بھی اسٹاک ایکسچینج میں تیزی چھائی رہی اور بینچ مارک کے ایس ای 100 انڈیکس 1,547.05 پوائنٹس اضافے کے بعد 146,929.84 پر بند ہوا۔
PSX Soars in FY 2025 – Outperforms Global Markets!
The Pakistan Stock Exchange (PSX) has delivered an exceptional performance in FY 2024-25, outshining major global markets with impressive returns in US Dollar terms!
🔹 PSX leads the charge, showcasing resilience and growth… pic.twitter.com/ChQZfOscmi
— Sarmaaya Financials (@sarmaayapk) August 11, 2025
وزیر خزانہ محمد اورنگزیب نے امریکا سے واپسی پر غیر رسمی گفتگو میں بتایا کہ جلد مختلف شعبوں میں بڑے پیمانے پر امریکی سرمایہ کاری کی خوشخبری ملے گی۔ ان کے بقول امریکا کے ساتھ تجارتی مذاکرات کامیاب رہے ہیں اور پاکستان درست سمت میں آگے بڑھ رہا ہے، جس کے نتائج جلد سامنے آئیں گے۔
عالمی اسٹاک مارکیٹ پوزیشن
عالمی سطح پر بھی منگل کو زیادہ تر ایشیائی حصص میں تیزی رہی، جس کی وجہ دنیا کی دو بڑی معیشتوں امریکا اور چین کے درمیان محصولات کی جنگ میں 90 دن کی مہلت کا اعلان تھا، امریکی صدر ڈونلڈ ٹرمپ نے یہ فیصلہ پیر کو کیا، جس سے چینی اشیا پر بھاری محصولات عارضی طور پر رک گئیں۔
اس فیصلے، امریکی فیڈرل ریزرو کی ممکنہ شرح سود میں کمی کی توقعات، اور مستحکم کارپوریٹ نتائج نے سرمایہ کاروں کا اعتماد بڑھایا۔
جاپان کا نکی انڈیکس ریکارڈ بلندی پر پہنچ گیا اور 2 فیصد اوپر بند ہوا، آسٹریلیا کا بینچ مارک انڈیکس بھی بلند ترین سطح پر پہنچا، جہاں مرکزی بینک کی جانب سے شرح سود میں کمی کے امکان پر بازار مثبت رہا۔ اس دوران ایم ایس سی آئی کا ایشیا-پیسیفک انڈیکس معمولی حد تک اوپر گیا، جبکہ چین کا بلیو چِپ انڈیکس مستحکم اور ہانگ کانگ کا ہینگ سینگ انڈیکس 0.1 فیصد کم رہا۔
