وزیراعظم شہباز شریف اور فیلڈ مارشل عاصم منیر سیلاب سے متاثرہ علاقوں کے دورے پر پہنچ گئے۔
میڈیا رپورٹ کے مطابق وزیراعظم اور فیلڈ مارشل سب سے پہلے سوات پہنچے جہاں وفاقی وزیر امیر مقام نے ان کا استقبال کیا۔
یہ بھی پڑھیں:سیلاب متاثرین کو تنہا نہیں چھوڑیں گے، سب کو معاوضہ ملے گا، وزیر اعلیٰ خیبر پختونخوا
اس موقع پر وفاقی وزراء عطاء تارڑ، امیر مقام اور احسن اقبال بھی وزیراعظم کے ہمراہ تھے۔
حکام کا کہنا ہے کہ سوات کے بعد وزیراعظم اور فیلڈ مارشل بونیر روانہ ہوگئے جہاں انہوں نے بونیر اور شانگلہ کے متاثرہ علاقوں کا فضائی جائزہ لیا۔
وزیراعظم نے بونیر میں متاثرین سے ملاقات بھی کی اور امدادی چیک تقسیم کیے۔
خیال رہے کہ خیبر پختونخوا میں حالیہ بارشوں اور سیلاب سے اب تک 350 سے زائد افراد جاں بحق ہو چکے ہیں، جن میں 228 کا تعلق بونیر سے ہے۔
دوسری جانب، این ڈی ایم اے کے مطابق صوبے کے متاثرہ علاقوں میں امدادی سامان کی ترسیل جاری ہے۔
یہ بھی پڑھیں:سندھ میں شدید بارشوں کا الرٹ: کراچی، حیدرآباد، سکھر اور ملحقہ علاقوں میں سیلاب کا خطرہ
آج صبح باجوڑ اور مانسہرہ کے لیے 2 الگ الگ کھیپیں روانہ کی گئیں جن میں خیمے، کمبل، جنریٹر، ڈی واٹرنگ پمپس، راشن بیگز اور ادویات شامل ہیں۔
این ڈی ایم اے کا کہنا ہے کہ یہ سامان متعلقہ ضلعی انتظامیہ کے حوالے کیا جائے گا تاکہ متاثرین میں تقسیم کیا جا سکے۔ جبکہ این ڈی ایم اے مسلح افواج اور فلاحی اداروں کے تعاون سے کے پی اور گلگت بلتستان کے لیے بھی امدادی سرگرمیاں جاری رکھے ہوئے ہے۔
