برطانیہ کی ملکہ کمیلا نے بکنگھم پیلس کی جاری تزئین و آرائش میں ایک نئی اور شاندار لائبریری کی تعمیر کی تجویز پیش کی ہے، جس پر بادشاہ چارلس سوم کی جانب سے ناپسندیدگی اور ناراضی کا اظہار کیا گیا ہے۔ شاہی ذرائع کے مطابق اس تجویز نے دونوں شخصیات کے درمیان اختلافات کو جنم دیا ہے۔
بکنگھم پیلس کی تزئین و آرائش پر تقریباً 369 ملین پاؤنڈ (تقریباً 750 ملین آسٹریلوی ڈالر) لاگت آئے گی، یہ منصوبہ 2017 میں شروع ہوا تھا، جس کی تکمیل 10 سال میں متوقع ہے۔ اس کا مقصد محل کے بوسیدہ برقی، نکاسی آب اور دیگر بنیادی نظاموں کو جدید خطوط پر استوار کرنا ہے تاکہ اسے آئندہ نصف صدی تک محفوظ اور فعال رکھا جا سکے اور آگ اور سیلاب کے خطرات کو کم کیا جا سکے۔
یہ بھی پڑھیں: انسان نما روبوٹ کا کمال، ملکہ الزبتھ کے بعد شاہ چارلس کی بھی تصویر بنا ڈالی
ملکہ کمیلا کی خواہش ہے کہ محل میں ایک جدید اور باوقار لائبریری قائم کی جائے کیونکہ بکنگھم پیلس میں اس وقت کوئی مستقل لائبریری موجود نہیں، جبکہ آخری بار شاہ جارج چہارم نے شاہی کتب خانہ 19ویں صدی میں برٹش میوزیم کو عطیہ کر دیا تھا۔
ایک شاہی ذرائع کے مطابق ’کتابوں اور مطالعے سے ملکہ کمیلا کی گہری وابستگی ہے، اور وہ سمجھتی ہیں کہ شاہی رہائش گاہ میں لائبریری کا نہ ہونا ناقابلِ قبول ہے۔ یہ ان کی ذاتی طور پر سب سے اہم خواہش ہے‘۔
یہ بھی پڑھیں: پرنس ولیم اور ہیری کے درمیان برسوں پرانی رقابت کی وجہ کیا ہے؟
تاہم بادشاہ چارلس کو اس تجویز پر شدید تحفظات ہیں۔ ذرائع کے مطابق، تعمیراتی منصوبے کی بڑھتی ہوئی لاگت اور پیچیدگی پہلے ہی ان کے لیے تشویش کا باعث بنی ہوئی ہے، اور اس میں ایک اضافی کمرے کی خواہش انہیں مزید پریشان کر رہی ہے۔
کہا جا رہا ہے کہ یہ معاملہ دونوں کے درمیان ’اختلاف کی وجہ‘ بن چکا ہے، حالانکہ شاہی جوڑے نے حال ہی میں اپنی 20ویں شادی کی سالگرہ منائی ہے۔
ملکہ کمیلا، جو کہ ادب، مطالعہ اور خواندگی کے فروغ کی سرگرم حامی رہی ہیں، The Queen’s Reading Roomجیسے ادبی پلیٹ فارمز کے ذریعے مصنفین اور قارئین کی حوصلہ افزائی کرتی رہی ہیں۔ وہ مختلف اسکولوں، جیلوں اور کمیونٹی سینٹرز کا دورہ کر چکی ہیں اور کئی فلاحی اداروں کی سرپرست بھی ہیں۔
یہ بھی پڑھیں: ملکہ الزبتھ کی شادی کے کیک کا نایاب ٹکڑا فروخت، خریدار نے کھانے کا منصوبہ بنا لیا
گزشتہ ماہ انہوں نے ایک ادبی میلے سے خطاب کرتے ہوئے بتایا کہ ان کا یہ منصوبہ لاک ڈاؤن کے دوران محض نو پسندیدہ کتابوں کی ایک فہرست کے طور پر شروع ہوا تھا، جو اب ایک عالمی سطح پر معروف آن لائن کمیونٹی میں تبدیل ہو چکا ہے۔
فی الوقت شاہ چارلس اور ملکہ کمیلا کلیرنس ہاؤس میں قیام پذیر ہیں، جہاں ایک لائبریری پہلے ہی موجود ہے جو کہ ملکہ الزبتھ دوم (بطور شہزادی) کے دور میں ایک داخلی ہال کو تبدیل کر کے بنائی گئی تھی۔
