سعودی عرب کے خطے جازان میں روایتی لباس محض کپڑا یا دھاگہ نہیں بلکہ ایک زندہ یادگار ہے جو اس سرزمین اور اس کے باسیوں کی کہانی سناتا ہے۔
سعودی پریس ایجنسی کی رپورٹ کے مطابق سعودی عرب کے روایتی ملبوسات رنگوں، نقش و نگار اور ثقافتی جزئیات سے بھرپور ہیں، جو نہ صرف معاشرتی جڑوں کی عکاسی کرتے ہیں بلکہ قومی ورثے اور شناخت کا اظہار بھی ہیں۔
جازان کے علاقے میں روایتی لباس ایک ثقافتی زبان کے طور پر نسل در نسل فخر اور وابستگی کا پیغام منتقل کرتا ہے۔
مردوں کے ملبوسات وقار کی علامت سمجھے جاتے ہیں، جن میں استعمال ہونے والے کپڑے مقامی موسم اور ماحول کے مطابق چُنے جاتے ہیں۔ پہاڑی علاقوں میں موٹے کاٹن کے لباس سردی سے بچاؤ فراہم کرتے ہیں، جب کہ ساحلی علاقوں میں ہلکے کپڑے گرمی اور نمی میں راحت دیتے ہیں۔
خواتین کا لباس حسن، رنگ اور علامتوں کا مجموعہ ہوتا ہے، جس کے ڈیزائن روزمرہ پہننے اور تہواروں کے مواقع کے لحاظ سے مختلف ہوتے ہیں۔ ان کے ملبوسات میں قدرت کے رنگ جھلکتے ہیں۔ پہاڑوں کا سبز، سمندر کا نیلا اور ریت کا سنہری رنگ جو عورتوں کے اپنے ماحول سے گہرے تعلق کی عکاسی کرتے ہیں۔
جدید فیشن کے بڑھتے ہوئے رجحان کے باوجود جازان کے لوگ آج بھی اپنے روایتی لباس کو روزمرہ زندگی اور سماجی تقریبات میں فخر کے ساتھ پہنتے ہیں۔
نوجوان ڈیزائنرز اور دستکار اب اس ثقافتی ورثے کو سعودی وژن 2030 کے مطابق جدید انداز میں زندہ کر رہے ہیں۔ وہ روایتی اور جدید طرز کے حسین امتزاج کے ذریعے جازان کے لباس کو ماضی اور حال کے درمیان ایک خوبصورت پل بنا رہے ہیں جو نہ صرف شناخت کا مظہر ہے بلکہ مستقبل کی سمت بھی متعین کررہا ہے۔
