اسپیکر قومی اسمبلی سردار ایاز صادق نے سیاسی کشیدگی میں کمی کے لیے کردار ادا کرنے کی پیشکش کردی۔
مزید پڑھیں: پی ٹی آئی اپنے گھر پر توجہ دے، ن لیگ اور پیپلزپارٹی کے درمیان سیاسی کشیدگی جلد ختم ہو جائےگی، خواجہ آصف
قومی اسمبلی اجلاس کے دوران گفتگو کرتے ہوئے انہوں نے کہاکہ میں حکومت اور اپوزیشن کے درمیان مذاکرات کے لیے کردار ادا کرنے کو تیار ہوں۔
انہوں نے شکوہ کرتے ہوئے کہاکہ میں نے پہلے بھی کردار ادا کیا مگر مجھے اچھا صلہ نہیں ملا، اب لوگ بیٹھ جائیں اور مشاورت کرکے بتا دیں کہ کیا کرنا ہے۔
ایاز صادق نے کہاکہ اداروں کے خلاف بات کرکے کچھ حاصل نہیں ہوگا، ادارے سرحدوں کا دفاع کررہے ہیں، اور دہشتگردی کے خلاف لڑ رہے ہیں، الزامات لگانا مناسب نہیں۔
اپوزیشن لیڈر کی تقرری سے متعلق گفتگو کرتے ہوئے انہوں نے کہاکہ اپوزیشن لیڈر کا معاملہ ابھی بھی عدالت میں زیر التوا ہے، جیسے ہی عدالت کا حکم آتا ہے پھر فیصلہ کروں گا۔
واضح رہے کہ اس وقت جہاں ملک میں سیاسی کشیدگی عروج پر ہے وہیں ادارے بھی بیچ میں آ گئے ہیں۔ بانی پی ٹی آئی عمران خان کی فیلڈ مارشل عاصم منیر پر تنقید کے بعد ڈی جی آئی ایس پی آر نے پریس کانفرنس کرتے ہوئے عمران خان کو ذہنی مریض اور قومی سلامتی کے لیے خطرہ قرار دیا۔
مزید پڑھیں: ایک ذہنی مریض سے ’ذہنی ڈاکٹر‘ ہی مذاکرات کر سکتا ہے، مریم اورنگزیب کی عمران خان پر تنقید
بعد ازاں وزیر مملکت داخلہ طلال چوہدری نے گفتگو کرتے ہوئے کہاکہ اب ہم پاکستان تحریک انصاف پر پابندی لگانے پر غور کریں گے۔
