پاور ڈویژن کی کوششوں کے نتیجے میں بجلی کے اسمارٹ میٹرز کی قیمتوں میں نمایاں کمی کردی گئی ہے۔
وفاقی وزیر برائے پاور اویس لغاری نے بتایا کہ مسابقتی عمل کو فروغ دینے سے ڈسکوز کے لیے اسمارٹ میٹرز کی قیمتیں 40 فیصد تک کم ہوئی ہیں۔
مزید پڑھیں: اپنے بجلی میٹر کا خیال رکھیں ورنہ لاکھوں روپے کا بل آسکتا ہے، جانیے کیسے؟
اویس لغاری کے مطابق اسمارٹ میٹرز کی قیمتوں میں کمی کے باعث ملکی سطح پر 150 ارب روپے کی بچت متوقع ہے۔
انہوں نے بتایا کہ تین فیز اسمارٹ میٹر کی قیمت 45 ہزار روپے سے کم ہو کر 25 ہزار روپے ہو گئی ہے جبکہ سنگل فیز میٹر کی قیمت میں 7 ہزار روپے کی کمی آئی ہے۔
وفاقی وزیر نے کہاکہ حکومت نے پاکستان انجینیئرنگ کونسل کے ریگولیشنز میں مثبت تبدیلیاں کی ہیں جس کے باعث بین الاقوامی کمپنیوں نے مسابقتی عمل میں بھرپور حصہ لیا اور انہیں درپیش رکاوٹیں دور کر دی گئیں۔
اویس لغاری کا کہنا تھا کہ نئے اسمارٹ میٹرز کی قیمت میں کمی سے بجلی صارفین کو ڈیمانڈ نوٹس کی مد میں کم رقم ادا کرنا پڑے گی۔
انہوں نے مزید بتایا کہ اسمارٹ میٹرز کے ذریعے غلط میٹر ریڈنگ اور بجلی چوری کی فوری نشاندہی ممکن ہو سکے گی۔
وفاقی وزیر کے مطابق اسمارٹ میٹرز صارفین کو پیشگی ادائیگی کی سہولت فراہم کریں گے جبکہ صارفین اپنے میٹرز کی براہ راست مانیٹرنگ بھی کر سکیں گے۔
مزید پڑھیں: وزیراعظم کا ’اپنا میٹر، اپنی ریڈنگ‘ اسمارٹ ایپ کا افتتاح، بجلی کے بلوں میں پی ٹی وی کی فیس ختم کرنے کا اعلان
’اس کے علاوہ بجلی کے استعمال سے متعلق تفصیلی معلومات، بغیر لائن مین بجلی کی بحالی سمیت دیگر بے شمار فوائد بھی حاصل ہوں گے۔‘
