صدر انٹرنیشنل مسلم ویمن یونین اور سابق رکن پارلیمنٹ و اسلامی نظریاتی کونسل ڈاکٹر سمیحہ راحیل قاضی نے بھارت کے ایک صوبے میں وزیر اعلیٰ کی جانب سے ایک عورت سے نقاب زبردستی ہٹانے کی وائرل ویڈیو پر گہری تشویش اور احتجاج کا اظہار کیا ہے۔
ڈاکٹر سمیحہ نے کہا کہ نقاب پہننا عورت کی ذاتی آزادی اور مذہبی حق ہے اور کسی مرد خاص طور پر صاحب اختیار اور اقتدار کی جانب سے اسے زبردستی ہٹانا انسانی وقار، عدل اور اخلاقیات کی خلاف ورزی ہے۔ انہوں نے مزید کہا کہ قرآن کریم ہمیں ظلم سے روکتا ہے اور ظلم پر خاموش رہنا بھی زیادتی کے مترادف ہے لہٰذا اس واقعے پر خاموشی اختیار کرنا درست نہیں۔
یہ بھی پڑھیں: مسلم خاتون ڈاکٹر کا نقاب کھینچ کر اتارنے کا افسوسناک واقعہ، بھارت میں وزیراعلیٰ نتیش کمار کی نااہلی کی تحریک چل پڑی
انہوں نے کہا کہ قانونی اور آئینی راستہ اختیار کیا جانا چاہیے۔ واقعے کی قانونی شکایات درج کرائی جائیں اور عدالتی کارروائی کے ساتھ انسانی حقوق کمیشن سے رجوع کیا جائے۔ اس معاملے کو صرف مذہبی یا جذباتی مسئلہ نہ سمجھتے ہوئے شہری آزادی اور عورت کی عزت کے تناظر میں دیکھا جانا چاہیے۔
ڈاکٹر سمیحہ نے مہذب اور پرامن مزاحمت، سول و اخلاقی احتجاج، پریس بریفنگز اور سوشل میڈیا پر مضبوط بیانیہ کے ذریعے اس مسئلے کو اجاگر کرنے پر زور دیا۔ ساتھ ہی انہوں نے عالمی میڈیا، OIC اور انسانی حقوق کے اداروں کو بھی متوجہ کرنے کی ضرورت پر روشنی ڈالی۔
یہ بھی پڑھیں: ’ہمیں یہ برداشت نہیں‘، راکھی ساونت کا مسلمان خاتون کا نقاب کھینچنے پر نتیش کمار سے عوامی معافی کا مطالبہ
انہوں نے کہا کہ متاثرہ خاتون کے حقوق اور نفسیاتی تحفظ کو یقینی بنانا انتہائی ضروری ہے اور اس معاملے میں متاثرہ خاتون کی رازداری اور حمایت کو مدنظر رکھنا چاہیے۔ ڈاکٹر سمیحہ نے کہا کہ بھارت وہ ملک ہے جو دنیا کی سب سے بڑی جمہوریت ہونے کا دعویٰ تو کرتا ہے مگر ان کے ہاں مذہبی آزادی نہیں ہے اور نہ ہی وہ عورت کی عزت کرتے ہیں۔
ان کا کہنا تھا کہ بھارت میں مذہبی آزادی اور عورت کی عزت کے حوالے سے یہ ایک شرمناک واقعہ ہے اور عالمی سطح پر اس کے خلاف باوقار اور قانونی احتجاج جاری رہنا چاہیے۔نتیش کمار
