متحدہ قومی موومنٹ (ایم کیو ایم) کے مرکزی رہنما فاروق ستار نے کہا ہے کہ پارٹی کو ایک بار پھر سازش کے ذریعے دیوار سے لگایا جا رہا ہے۔
کراچی میں ایم کیو ایم کارکن حاجی شہزاد کی نماز جنازہ کے بعد میڈیا سے گفتگو کرتے ہوئے فاروق ستار نے کہاکہ ان کے کارکن کو شہر کے پُر رونق علاقے میں فائرنگ کر کے قتل کیا گیا۔
مزید پڑھیں: ایم کیو ایم کے سابق ایم پی اے کامران فاروقی 9 سال پرانے 2 مقدمات میں بری
انہوں نے کہاکہ سرجانی اور ملیر میں پارٹی کے کامیاب جلسوں سے مخالفین خوفزدہ ہیں، ایم کیو ایم مستحکم ہو رہی ہے اور ایم این اے کے فنڈز کے ذریعے ترقیاتی کام جاری ہیں۔
فاروق ستار نے سندھ کے آئی جی اور وزیراعلیٰ مراد علی شاہ سے مطالبہ کیا کہ حاجی شہزاد کے قاتلوں کو فوری گرفتار کیا جائے۔
قبل ازیں، نیو کراچی سیکٹر 5 ای میں حاجی شہزاد کی نماز جنازہ ادا کی گئی، جس میں ایم کیو ایم کے رہنما اور کارکن بڑی تعداد میں شریک ہوئے۔
مزید پڑھیں: ایم کیو ایم میں دھڑے بندی، کیا پارٹی مجبوری کے تحت متحد ہے؟
واضح رہے کہ گزشتہ روز نیو کراچی میں چائے کے ہوٹل پر فائرنگ کے نتیجے میں واٹر بورڈ کا ایک ملازم ہلاک ہوا تھا۔ پولیس کے مطابق یہ بظاہر ٹارگٹڈ کلنگ تھی، جبکہ ایم کیو ایم کا مؤقف ہے کہ جاں بحق حاجی شہزاد نیو کراچی یو سی 8 کے جوائنٹ انچارج تھے۔
