دنیا کے معتبر ترین جریدے فارن پالیسی نے صدر ڈونلڈ ٹرمپ کی نئی خارجہ پالیسی کا جائزہ لیتے ہوئے پاکستان کو نمایاں کامیاب ممالک میں شامل کر لیا ہے، جبکہ بھارت کو ’لوزرز‘ قرار دیا گیا ہے۔ جریدے کے مطابق پاکستان نے واشنگٹن میں دوبارہ مضبوط سفارتی مقام حاصل کر لیا ہے۔
یہ بھی پڑھیں:صدر ٹرمپ کی جنوبی ایشیا پالیسی میں پاکستان مرکزی ستون بن گیا جبکہ انڈیا فرسٹ کا دور ختم ہو گیا، واشنگٹن ٹائمز
فارن پالیسی کے مطابق صدر ٹرمپ کے پہلے دور میں پاکستان پر سخت الزامات لگائے گئے تھے اور زیادہ تر فوجی امداد بھی معطل کر دی گئی تھی، تاہم دوسرے دور میں صورتحال یکسر بدل گئی۔ دہشتگردی کے خلاف ایک بڑے امریکی ماسٹر مائنڈ کی گرفتاری میں پاکستان کے کردار نے صدر ٹرمپ کو فوری کامیابی دلائی، جس کے نتیجے میں اسلام آباد کے لیے وائٹ ہاؤس تک نئی رسائی ممکن ہوئی۔
جریدے کے مطابق صدر ٹرمپ کا انداز مرکیوریل اور ٹرانزیکشنل ضرور ہے، مگر پاکستان نے اسی فریم ورک کے اندر رہتے ہوئے نتائج حاصل کیے۔ مسلسل ڈائیلاگ اور عملی ڈیل میکنگ کے ذریعے پاکستان نے ٹرمپ کے اس انداز کو اپنے حق میں استعمال کیا۔ کرپٹو کرنسی سے متعلق معاملات، اہم معدنیات پر تعاون اور مختلف سودے اسی پیکج کا حصہ بنے، حتیٰ کہ نوبیل پیس پرائز سے متعلق گفتگو کا حوالہ بھی سامنے آیا۔
فارن پالیسی نے یہ بھی لکھا کہ صدر ٹرمپ کی آرمی چیف جنرل عاصم منیر سے ذاتی قربت پاک امریکا تعلقات میں پیشرفت کی ایک اہم وجہ بنی۔ اسی تناظر میں اوول آفس میں امریکی وزیر خارجہ مارکو روبیو نے فیلڈ مارشل عاصم منیر اور وزیراعظم شہباز شریف کا استقبال کیا، جسے تعلقات میں گرمجوشی کی علامت قرار دیا گیا۔
پاکستان کے سفیر رضوان سعید شیخ کے مطابق پاک امریکا تعلقات ایک بار پھر بہت بہتر ہو چکے ہیں، تاہم اب ضروری ہے کہ اس سفارتی پیش رفت کو عملی نتائج میں بدلا جائے۔
یہ بھی پڑھیں:فیلڈ مارشل عاصم منیر زبردست فائٹرہیں، صدر ٹرمپ کا سیول میں خطاب
دوسری جانب فارن پالیسی کے مطابق بھارت کو ٹرمپ کی نئی خارجہ پالیسی میں ’لوزرز‘ میں شامل کیا گیا ہے۔ جریدے کا کہنا ہے کہ امریکا اور بھارت کے تعلقات دو دہائیوں کی کم ترین سطح پر پہنچ چکے ہیں، بھارت پر 50 فیصد ٹیرف برقرار ہیں اور دونوں ممالک کے درمیان تجارتی معاہدہ تاحال غیر یقینی صورتحال کا شکار ہے۔
