کوئٹہ نے کھیلوں کی ترقی کی جانب ایک تاریخی سنگِ میل طے کرلیا ہے، جہاں پاکستان کا پہلا بین الاقوامی فٹبال ٹریننگ کیمپ منعقد کیا جا رہا ہے۔
یہ بین الاقوامی فٹبال ٹریننگ کیمپ 26 جنوری سے 6 فروری تک حکومتِ بلوچستان اور ڈی ایچ اے کوئٹہ کے اشتراک سے منعقد کیا جارہا ہے۔
اس بین الاقوامی ٹریننگ کیمپ کے لیے برطانیہ کے شہر لیورپول سے اسٹیون جیرارڈ فٹبال کلب سے وابستہ 6 رکنی اعلیٰ سطحی کوچنگ ٹیم کوئٹہ پہنچ چکی ہے۔
یہ بھی پڑھیں: کوئٹہ میں آل بلوچستان اسپورٹس فیسٹیول کا دنگل، خواتین کھلاڑی پہلی بار شریک
2 ہفتوں پر مشتمل یہ کیمپ کھلاڑیوں کو جدید اور پیشہ ورانہ تربیت فراہم کرے گا، جہاں غیر ملکی کوچز جدید فٹبال تکنیک، فٹنس اور کھیل کی پیشہ ورانہ باریکیوں پر خصوصی توجہ دیں گے۔
غیر ملکی کوچز جدید فٹبال تربیتی طریقوں کے تحت کھلاڑیوں کی تکنیکی صلاحیتوں، جسمانی فٹنس اور کھیل کی پیشہ ورانہ باریکیوں پر خصوصی توجہ دیں گے۔
⚽ THE SGA FIRST INTERNATIONAL FOOTBALL TRAINING CAMP! ⚽
Scheduled between 26 January and 5 February, the SGA First International Football Training Camp at Quetta brings a sharper, more disciplined approach to football preparation – built on international coaching standards and… pic.twitter.com/7ce1SXbizS
— DHA Quettaᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠᅠ (@quetta_dha) January 21, 2026
اس ضمن میں صوبائی حکومت کی جانب سے 12 خواتین کھلاڑی سمیت 63 فٹبالرز کی بین الاقوامی معیار کی تربیت کا باقاعدہ منصوبہ مرتب کیا جاچکا ہے۔
کوچنگ ٹیم جدید اور پروفیشنل ٹریننگ سیشنز کے ذریعے نوجوان فٹبالرز کی فنی اور پیشہ ورانہ صلاحیتوں کو عالمی معیار تک لے جانے میں کردار ادا کرے گی۔
مزید پڑھیں: سونیا مصطفیٰ نے پہلی خاتون فیفافٹبال ریفری بن کر پاکستان کا سر فخر سے بلند کردیا
یہ اہم اقدام نوجوانوں کی مثبت سرگرمیوں میں شمولیت، کھیلوں میں شمولیت پسندی کے فروغ اور بین الاقوامی معیار کے اسپورٹس انفرا اسٹرکچر کی جانب بلوچستان کے بڑھتے ہوئے کردار کو نمایاں کرتا ہے۔
ماہرین کے مطابق یہ تربیتی کیمپ نہ صرف فٹبال کے فروغ میں اہم کردار ادا کرے گا بلکہ بلوچستان میں کھیلوں کے ایک مضبوط اور دیرپا نظام کی بنیاد رکھنے میں بھی مددگار ثابت ہوگا۔
وزیر اعلیٰ بلوچستان میر سرفراز بگٹی نے اس موقع پر کہا کہ بلوچستان کے کھیل کے میدانوں میں ایک بار پھر رونق لوٹ رہی ہے، جو صوبائی حکومت کی سنجیدہ کوششوں کا نتیجہ ہے۔
مزید پڑھیں: نیشنل گیمز میں بلوچستان کے کھلاڑیوں کی کارکردگی بدترین کیوں رہی؟
انہوں نے کہا کہ جدید تربیتی سیشنز سے کھلاڑیوں کے حوصلے، اعتماد اور پیشہ ورانہ صلاحیتوں میں نمایاں بہتری آئے گی۔
وزیر اعلیٰ نے واضح کیا کہ صوبائی حکومت کھیلوں کے فروغ اور نوجوان ٹیلنٹ کو آگے لانے کے لیے بھرپور سرمایہ کاری کر رہی ہے۔
ان کا کہنا تھا کہ بلوچستان کے کھلاڑیوں کو قومی اور بین الاقوامی سطح پر مواقع فراہم کرنا حکومت کی ترجیحات میں شامل ہے، تاکہ صوبے کا مثبت تشخص اجاگر ہو اور نوجوانوں کو صحت مند سرگرمیوں کی جانب راغب کیا جا سکے۔
