بھارتی میڈیا کے مطابق، بنگلہ دیش نے بھارتی کم لاگت ایئرلائن اسپائس جیٹ کو اس کی غیر ادا شدہ اوور فلائٹ فیس کی وجہ سے اپنی فضائی حدود استعمال کرنے کی اجازت معطل کر دی ہے۔
مزید پڑھیں: بنگلہ دیش میں رمضان المبارک کا چاند نظر آ گیا
ذرائع کے مطابق بنگلہ دیش کی سول ایوی ایشن اتھارٹی (CAAB) نے یہ فیصلہ اس وقت کیا جب ایئرلائن سے واجب الادا فیس وصول نہ ہو سکی۔ اس کے نتیجے میں کئی اسپائس جیٹ پروازیں، خاص طور پر کولکتہ سے شمال مشرقی بھارتی شہروں جیسے گوہاٹی اور ایمفال کے لیے چلنے والی پروازیں، طویل اور متبادل راستے اختیار کرنے پر مجبور ہو گئی ہیں۔
متبادل راستوں کی وجہ سے پرواز کا دورانیہ اور ایندھن کا استعمال بڑھ گیا، جس سے ایئرلائن کے آپریشنل اخراجات میں اضافہ ہو سکتا ہے۔
اسپائس جیٹ کے ترجمان نے اس حوالے سے کہا کہ ایئرلائن متعلقہ حکام کے ساتھ باقاعدہ رابطے میں ہے۔ انہوں نے کہا کہ یہ ایک معمول کا معاملہ ہے اور ہم جلد حل کے لیے کام کر رہے ہیں۔ ہماری پروازیں معمول کے مطابق چل رہی ہیں اور خدمات قواعد و ضوابط کے مطابق فراہم کی جا رہی ہیں۔
اسپائس جیٹ گزشتہ چند مہینوں سے مالی مشکلات کا سامنا کر رہی ہے۔ دسمبر 2025 کو ختم ہونے والے سہ ماہی مالیاتی رپورٹ میں ایئرلائن نے 269.27 کروڑ روپے کا نقصان ظاہر کیا، جس کی وجہ بڑھتے ہوئے اخراجات اور کچھ غیر معمولی لاگتیں بتائی گئی ہیں۔
مزید پڑھیں: بنگلہ دیش کی نئی حکومت کا صحافتی آزادی کے تحفظ کا عزم
فلائٹ ٹریکنگ ویب سائٹ Flightradar24 کے ڈیٹا کے مطابق جمعرات کو کولکتہ اور شمال مشرقی بھارتی شہروں کے درمیان چلنے والی اسپائس جیٹ پروازوں نے بنگلہ دیش کی فضائی حدود سے گریز کیا اور طویل متبادل راستے اپنائے۔
