کوہستان کرپشن اسکینڈل کے مرکزی ملزم قیصر اقبال کے ڈرائیور نے پلی بارگین کے تحت ساڑھے 4 ارب روپے ادا کردیے اور رہا ہوگئے ہیں۔
مزید پڑھیں: کوہستان کا 40 ارب روپے کا میگا اسکینڈل، نیب نے مزید 20 کروڑ روپے برآمد کرلیے
ترجمان کے مطابق چیئرمین نیب نے ملزم قیصر اقبال کے ڈرائیور ممتاز کی پلی بارگین کی درخواست منظور کرلی۔
نیب کے مطابق احتساب عدالت نے بھی ڈرائیور ممتاز کی پلی بارگین درخواست کی توثیق کردی ہے۔
نیب کے مطابق ڈرائیور ممتاز کوہستان اسکینڈل کے مرکزی ملزم قیصر خان کا بے نامی دار اور ڈرائیور ہے۔
ڈپٹی پراسیکیوٹر جنرل نیب کے مطابق مرکزی ملزم کے بے نامی دار کی حیثیت سے ممتاز کے اکاؤنٹ میں رقم منتقل ہوئی، جس میں 4 ارب 50 کروڑ روپے کی ٹرانزیکشن شامل ہے۔
نیب نے مزید بتایا کہ تحقیقات کے دوران ممتاز کو حراست میں لیا گیا تھا۔
مزید پڑھیں: کوہستان 40 ارب روپے کرپشن اسکینڈل: نیب نے 5 مزید ملزمان گرفتار کرلیے
واضح رہے کہ 40 ارب روپے کے میگا کرپشن اسکینڈل میں اس سے قبل بھی 20 کروڑ روپے برآمد کیے گئے تھے۔
قومی احتساب بیورو (نیب) نے مرکزی ملزم اور اسکینڈل کے ماسٹر مائنڈ قیصر اقبال کے گھر ایبٹ آباد میں چھاپہ مار کارروائی کے دوران 20 کروڑ روپے برآمد کیے تھے۔
