وزیراعلیٰ بلوچستان سرفراز بگٹی نے کوئٹہ میں دیگر حکام کے ہمراہ پریس کانفرنس کرتے ہوئے گزشتہ دنوں پیش آنے والے دہشتگردی کے واقعات کی تفصیلات پیش کیں۔
ان کا کہنا تھا کہ ان واقعات کے بارے میں ہمیں پہلے سے خبر تھی، اس لیے ایک دن پہلے ہی آپریشنز شروع کیے، عسکریت پسندوں کا خیال تھا کہ وہ پنجگور، شبان اور کوئٹہ کے شمالی مشرقی علاقوں میں حملے کریں گے، لیکن سیکیورٹی فرسز کی کوششوں کی وجہ سے وہاں حملے نہیں ہوئے۔
یہ بھی پڑھیے: بلوچستان میں دہشتگردوں کے حملے ناکام، 2 روز میں 3 خودکش بمباروں سمیت 133 دہشتگرد ہلاک، 15 جوان شہید
وزیراعلیٰ نے دعویٰ کیا کہ 40 گھنٹوں میں 145 عسکریت پسندوں کو ہلاک کردیا ہے جن کی لاشیں بھی ہمارے پاس ہیں، دہشتگردی کے خلاف جنگ میں اتنے کم عرصے میں اتنی زیادہ ہلاکتیں ایک دن میں نہیں ہوئی تھیں، پورے سال میں 1500 سے زائد دہشتگرد مارے گئے تھے، نوشکی میں کلیئرنس آپریشن میں وقت لگا لیکن اب قابو میں آگیا ہے۔
انہوں نے بتایا کہ سیکیورٹی فورسز کے 17 جوان ان حملوں میں شہید ہوئے جن میں پولیس اور ایف سی شامل ہیں، 31 سیویلینز شہید اور زخمی ہوئے، دہشتگرد جہاں گئے سیف سٹی کیمروں کو نشانہ بناتے رہے۔
سرفراز بگٹی نے کہا ہے کہ ان واقعات میں سب سے دردناک واقعہ گوادر میں پیش آیا جہاں ایک خضدار سے تعلق رکھنے والے بلوچ گھرانے کو دہشتگردوں نے شہید کردیا، جن میں 5 خواتین اور 3 بچے شامل ہیں، یہ قومیت کی جنگ نہیں دہشت کی جنگ ہے جس میں بلوچوں کو ایندھن بنایا جا رہا ہے۔
یہ بھی پڑھیے: امریکا کی بلوچستان میں دہشتگرد حملے کی شدید مذمت، پاکستان کے ساتھ یکجہتی کا اظہار
انہوں نے کہا کہ دہشتگردوں کے لیڈر نے اسے آزادی کی جنگ قرار دی لیکن ایک یونین کونسل کو بھی آزاد نہیں کراسکتے، اگر اتنی سکت نہیں تو بلوچوں کو ایندھن کیوں بناتے ہو؟ اس جنگ کو محرومی اور غیرمنصفانہ ترقی سے جوڑا جارہا ہے جو غلط ہے۔ یہ ہمیں غیرمستحکم کرسکتے ہیں مگر ایک انچ بھی زمین نہیں لے سکتے، وہ ہم سے سرنڈر کرانا چاہتے ہیں مگر ہم ایک ہزار سال تک جنگ لڑیں گے، پاکستان ٹوٹنے کے لیے نہیں بنا۔
وزیراعلیٰ نے کہا ہے کہ یہ کہنے والے کہ طاقت سے مسئلہ حل نہیں ہوگا، آئیں اور کسی دوسرے طریقے سے مسئلہ حل کرا کر دکھائیں، یہاں طاقت کا استعمال کبھی نہیں ہوا ہے، قوم پرستی کے نام پر تشدد کو جواز نہیں بخشا جاسکتا، سوشل میڈیا کے ذریعے نوجوانوں کو ریاست سے دور لے جایا جارہا ہے لیکن ہم کوشش کر رہے ہیں کہ نوجوانوں اور عوام کو ساتھ لے کر چلیں۔
یہ بھی پڑھیے: بلوچستان میں ہونے والی دہشتگردی کے پیچھے بھارت، دہشتگردوں کو ڈھونڈ کر ہلاک کریں گے، محسن نقوی
انہوں نے کہا ہے کہ دہشتگردی کے واقعات میں افغانستان میں موجود اسلحہ استعمال ہوا، دہشتگرد افغانستان میں پناہ حاصل کرتے ہیں، کسی بھی جگہ ان کا قبضہ نہیں ہوا، کوئٹہ میں میں خود پھرتا رہا۔
ان کا کہنا تھا کہ صوبے میں دہشتگردی کے حالیہ واقعات میں شہید ہونے والوں کو خراج تحسین پیش کرتا ہوں، ان کے لواحقین کے دیکھ بھال کی ذمہ داری ہماری ہے۔
