گورنر سندھ کامران ٹیسوری نے کہا ہے کہ گل پلازہ سانحے کے متاثرین کو گورنر سندھ اور ایم کیو ایم مل کر مفت پلاٹ فراہم کریں گے۔
گورنر ہاؤس میں سانحہ گل پلازہ کے متاثرین کے لیے تقریب کا انعقاد کیا گیا، جس میں گورنر سندھ، خالد مقبول صدیقی، فاروق ستار، علی خورشیدی، تنویر پاستا، تاجر رہنما جاوید بلوانی، زبیر موتی والا، اراکین قومی و صوبائی اسمبلی سمیت دیگر بھی موجود تھے۔
یہ بھی پڑھیں: گورنر سندھ کامران ٹیسوری کا سانحہ گل پلازہ کی جوڈیشل انکوائری کا مطالبہ
اس موقع پر گورنر سندھ کامران ٹیسوری نے کہا کہ کراچی شہر میں ٹیکس کے وسائل جمع تو ہوتے ہیں، لیکن یہاں خرچ نہیں کیے جاتے اور سانحات کے وقت انتظامیہ کے پاس اتنے وسائل نہیں ہوتے کہ کسی کی جان بچائی جا سکے۔
کامران ٹیسوری نے کہا کہ وزیر اعظم اور وزیر اعلیٰ کو اب شہر کے فیصلے کروانے چاہئیں اور اگر وفاق اور صوبہ اپنے فرائض انجام نہیں دے سکتے تو یہ کام گورنر ہاؤس کرے گا۔
انہوں نے سانحہ گل پلازہ میں ہونے والی ہولناک آگ پر روشنی ڈالتے ہوئے کہا کہ متاثرین کو ڈیڑھ ڈیڑھ کلو راکھ دی گئی، شہر کے ساتھ سوتیلی ماں جیسا سلوک کیا گیا اور مرنے والوں کی قیمت کا تعین ختم ہو چکا ہے۔ آئندہ ایسے سانحات سے بچاؤ کے لیے مناسب انتظامات کرنا ناگزیر ہے، لیکن انتظامیہ اس بارے میں کچھ نہیں بتا رہی۔
انہوں نے مزید کہا کہ یہاں سے جمع ہونے والے ٹیکس کا پانچ فیصد بھی شہر میں خرچ نہیں ہوتا اور متاثرین کی مشکلات کا حل فوری طور پر نکالنا ہوگا۔
یہ بھی پڑھیں: گل پلازہ کا ’قبرستان‘ جہاں 1200 دکانوں کا ملبہ جمع کیا جا رہا ہے
گورنر سندھ نے مزید کہا کہ گل پلازہ میں مرنے والے افراد کی قیمت کا تعین ختم ہو چکا ہے اور آئندہ ایسے واقعات نہ ہوں اس کے لیے انتظامات کرنے کی ضرورت ہے۔ انہوں نے کہا کہ لواحقین کو معاوضہ دینے کے اقدامات کیے جائیں گے تاکہ دوبارہ کسی کو نقصان نہ ہو اور شہر کے شہریوں کے حقوق کی حفاظت ہو۔
انہوں نے کہا کہ گل پلازہ سانحے کے ذمہ دار تمام حکومتی ادارے، یو سی ناظم، ٹاؤن ناظم اور میئر کراچی ہیں، اور گورنر سندھ نے بلڈرز سے بات کی ہے کہ متاثرین کو بلا معاوضہ پلاٹ دیا جائے۔ انہوں نے واضح کیا کہ شہر کے مرنے والے افراد کے ساتھ انصاف ہونا چاہیے اور عوامی آواز بلند کرنا ہر شہری کا حق ہے۔
’سانحہ گل پلازہ کے بعد وزیراعظم اور وزیر اعلیٰ سے کوئی امید نہیں رکھی جاسکتی‘
وفاقی وزیر اور چیئرمین ایم کیو ایم پاکستان ڈاکٹر خالد مقبول صدیقی نے کہا کہ سانحہ گل پلازہ کے بعد وزیر اعظم اور وزیر اعلیٰ سے کوئی امید نہیں رکھی جا سکتی، اس لیے گورنر سندھ اور ایم کیو ایم متاثرین کے حقوق کے لیے آگے آئیں گے۔
انہوں نے کہا کہ یہ شہر جن کا ہے وہ یہاں سیاست کرنے کی کوشش کر رہے ہیں، لیکن عبادت اور حق کی آواز ہر سیاست سے بڑی ہے۔ خالد مقبول صدیقی نے کہا کہ گل پلازہ سانحے کے بعد حق تلفیوں اور سانحات کے خلاف آواز بلند کرنا ضروری ہے اور شہر کے وسائل کو محفوظ بنانا وقت کی اہم ضرورت ہے۔
تاجر رہنما زبیر موتی والا نے کہا کہ کراچی چیمبر نے بولٹن مارکیٹ میں غیر سیاسی بنیادوں پر کام کیا اور متاثرین کی مدد کے لیے اقدامات کیے۔ انہوں نے گورنر سندھ کا شکریہ ادا کیا اور کہا کہ فائر سیفٹی کے حوالے سے تربیت بھی دی جا رہی ہے۔
یہ بھی پڑھیں: ایم کیو ایم کے اہم وزرا اور اراکین اسمبلی کی سیکیورٹی واپس کیوں لی گئی؟
صدر یونین گل پلازہ تنویر پاستا نے کہا کہ گورنر سندھ نے یقین دلایا ہے کہ جب تک تاجر بحال نہیں ہوتے وہ ہر قدم پر ان کے ساتھ رہیں گے اور وفاق سے بھی درخواست کی جائے گی کہ وہ متاثرین کی مدد کریں۔
جے ڈی سی کے سربراہ ظفر عباس نے کہا کہ سانحہ گل پلازہ میں انتظامات کی شدید کمی تھی اور متاثرین کو مناسب سہولتیں فراہم نہیں کی گئیں۔ انہوں نے کہا کہ آگ بجھانے کے دوران عمارت کے گرنے کا انتظار کیا گیا اور متاثرین کے ساتھ انصاف نہیں کیا گیا۔
مولانا بشیرفاروقی نے کہا کہ گورنر سندھ وہ کام کرواسکتے ہیں جو ماضی میں کسی نے نہیں کیا۔ انہوں نے تجویز دی کہ ایسا سیل قائم کیا جائے جہاں ہر متاثرہ فرد کی فریاد پہنچ سکے اور متاثرین کے گھریلو اخراجات کے لیے اقدامات کیے جائیں۔
’گورنر سندھ نے اداروں سے فوری رابطہ کیا اور لوگوں کو زندہ بچانے کے لیے اقدامات کیے‘
فاروق ستار نے کہا کہ گورنر سندھ نے اداروں سے فوری رابطہ کیا اور لوگوں کو زندہ بچانے کے لیے اقدامات کیے۔ انہوں نے کہا کہ کراچی کے لوگ یاد رکھیں کہ ہم ہر مشکل میں ان کے ساتھ کھڑے ہیں۔
انہوں نے فائر ٹینڈرز اور پانی کی کمی، پانچ سال سے فارنسک لیبارٹری نہ بننے، پی ڈی ایم اے کی غیر موجودگی اور انتظامی غفلت پر بھی سوالات اٹھائے۔
