معروف نعت خواں تابندہ لاری دل کے عارضے کے باعث انتقال کر گئیں۔ اسپتال حکام کے مطابق وہ گزشتہ چند دنوں سے نیشنل انسٹیٹیوٹ آف کارڈیالوجی میں زیر علاج تھیں۔
یہ بھی پڑھیں: معروف ننھا نعت خواں ساتھیوں سمیت ٹریفک حادثے میں جانبحق
اہل خانہ اور اسپتال ذرائع کا کہنا ہے کہ تابندہ لاری کو دل کی شدید تکلیف لاحق تھی اور مسلسل طبی نگرانی کے باوجود ان کی حالت بگڑتی چلی گئی، جس کے باعث وہ جانبر نہ ہو سکیں۔
مرحومہ کی نماز جنازہ آج بعد از عشا مسجد فاروق اعظم، نارتھ ناظم آباد کراچی میں ادا کی جائے گی۔ اہل خانہ، دوست احباب اور عقیدت مند بڑی تعداد میں شرکت کریں گے۔
تابندہ لاری اپنی سحر انگیز آواز اور دل کو چھو لینے والے اندازِ نعت خوانی کے باعث ملک بھر میں پہچانی جاتی تھیں۔ انہوں نے فنِ نعت کے فروغ میں اہم کردار ادا کیا اور بے شمار نوجوان نعت خواں ان کی رہنمائی اور انداز سے متاثر ہوئے۔
ان کے انتقال سے نعت خوانی کی دنیا ایک معتبر اور باوقار آواز سے محروم ہو گئی ہے۔
