وفاقی وزیر داخلہ محسن نقوی نے کراچی میں عوامی مرکز پاسپورٹ آفس اور جناح انٹرنیشنل ایئرپورٹ کا دورہ کیا، جہاں انہوں نے پاسپورٹ کے حصول کی سہولیات کو مزید وسعت دینے کا اعلان کیا ہے۔
ہفتے کے روز کراچی میں انہوں نے ایئرپورٹ پر امیگریشن سسٹم کی خرابی کا نوٹس لیتے ہوئے اسے فوری بحال کرنے اور جعلی یا نامکمل سفری دستاویزات کے حامل افراد کو سفر سے روکنے کا سخت حکم دیا ہے۔
۔وفاقی وزیرداخلہ محسن نقوی کا جناح انٹرنیشنل ائیرپورٹ کا دورہ
وزیرداخلہ محسن نقوی نے کاونٹرز پر امیگریشن پراسیس کا جائزہ لیاوزیرداخلہ محسن نقوی بیرون ممالک جانے والے مسافروں سے ملے اور امیگریشن پراسیس بارے پوچھا pic.twitter.com/fYqu7ewAxS
— Ministry of Interior GoP (@MOIofficialGoP) August 29, 2026
وزارت داخلہ کے اعلامیے کے مطابق وزیر داخلہ محسن نقوی نے عوامی مرکز کراچی میں واقع پاسپورٹ آفس کے دورے کے دوران وہاں موجود شہریوں سے ملاقات کی۔
یہ بھی پڑھیں:محسن نقوی کا فیڈرل کانسٹیبلری ٹریننگ سینٹر شب قدر کا دورہ، اینٹی رائٹ ونگ کی تربیتی مشقوں کا معائنہ
انہوں نے درخواست گزاروں سے ٹوکن کے اجرا اور کاؤنٹر تک باری آنے میں لگنے والے وقت کے بارے میں دریافت کیا۔ اس موقع پر شہریوں نے پاسپورٹ کے اجرا کے نظام پر اطمینان کا اظہار کرتے ہوئے بتایا کہ ان کا کام محض چند منٹوں میں مکمل ہو گیا ہے۔
وزارت داخلہ کے مطابق درخواست گزاروں کا کہنا تھا کہ انہیں پاسپورٹ بنوانے میں کسی مشکل کا سامنا نہیں کرنا پڑا اور نہ ہی انہیں طویل انتظار کی زحمت اٹھانا پڑی۔ اس موقع پر وزیر داخلہ نے شہریوں کی سہولت کے لیے پاسپورٹ آفس کی سہولیات کو مزید وسعت دینے کا عزم ظاہر کیا۔
کراچی ایئرپورٹ پر امیگریشن سسٹم کی خرابی اور وزیر داخلہ کی ہدایات
وزارت داخلہ کی جانب سے صبح جاری کیے گئے ایک الگ بیان میں بتایا گیا کہ محسن نقوی نے جناح انٹرنیشنل ایئرپورٹ کا بھی دورہ کیا۔
دورے کے دوران جب وہ کاؤنٹرز پر کارروائی کا جائزہ لے رہے تھے، عین اسی وقت ایئرپورٹ کا امیگریشن سسٹم خراب ہو گیا۔
وزیر داخلہ نے اس صورتحال کا فوری نوٹس لیتے ہوئے متعلقہ حکام سے رابطہ کیا اور خرابی کو ہنگامی بنیادوں پر دور کرنے کی ہدایت کی۔
وزیر داخلہ کے دورے کے دوران امیگریشن سسٹم ڈاؤن، وزیر داخلہ کا موقع پر ہی متعلقہ حکام سے ٹیلیفونک رابطہ
امیگریشن سسٹم کی خرابی فوری دور کرنے کی ہدایت
سسٹم ڈاؤن ہونے کی صورت میں متبادل انتظام کا بندوبست رکھا جائے۔ محسن نقوی
امیگریشن پراسیس کسی صورت رکنا نہیں چاہیے۔
— Ministry of Interior GoP (@MOIofficialGoP) August 29, 2026
انہوں نے زور دیا کہ ایسے واقعات کی صورت میں متبادل انتظامات کو ہر حال میں یقینی بنایا جائے۔ وزیر داخلہ کا واضح کہنا تھا کہ ‘امیگریشن کا عمل کسی بھی صورت میں نہیں رکنا چاہیے’۔
اس کے علاوہ انہوں نے بیرون ملک جانے والے مسافروں سے بھی ملاقات کی اور ان سے امیگریشن کے عمل کے بارے میں دریافت کیا۔
مزید پڑھیں:وزارت داخلہ کے اداروں کو جدید خطوط پر مکمل طور پر تبدیل کرنا ہدف ہے، محسن نقوی
وزیر داخلہ نے حکام کو جعلی، نامکمل اور غیر تصدیق شدہ دستاویزات کے حامل مسافروں کے خلاف سخت کارروائی کا حکم دیتے ہوئے واضح کیا کہ ایسے افراد کو کسی بھی صورت میں سفر کی اجازت نہیں دی جائے گی۔
عوامی مرکز پاسپورٹ آفس میں یہ بہتری ایک ایسے وقت میں سامنے آئی ہے جب رواں سال جون میں اسی دفتر کے اہلکاروں کو ایک غیر ملکی شہری کو پاکستانی پاسپورٹ جاری کرنے کے سنگین الزام میں معطل کر دیا گیا تھا۔
وزیر داخلہ محسن نقوی اس سے قبل بھی کراچی کے دورے کر چکے ہیں؛ جولائی کے اواخر میں انہوں نے صدر آصف علی زرداری سے ملاقات کی تھی، جبکہ جون میں انہوں نے صفورا گوٹھ کے علاقے میں نادرا کے میگا سینٹر کا اچانک دورہ بھی کیا تھا۔
