امریکی محکمہ خارجہ نے پاکستان سے پاکستان تحریک انصاف (پی ٹی آئی) کی سرگرم رکن اور 9 مئی کے واقعات کی مبینہ کلیدی ملزم خدیجہ شاہ تک قونصلر رسائی کا مطالبہ کیا ہے۔
منگل کو اپنی ہفتہ وار پریس بریفنگ کے دوران امریکی محکمہ خارجہ کے پرنسپل نائب ترجمان ویدانت پٹیل کہا کہ امریکا نے پاکستانی حکومت سے فیشن ڈیزائنر خدیجہ شاہ تک قونصلر رسائی دینے کو کہا ہے۔
اس موقع پر ترجمان سے پوچھا گیا تھا کہ کیا بائیڈن انتظامیہ 9 مئی کے احتجاج کے بعد گرفتار کیے گئے امریکی شہریوں کی رہائی میں مدد کر رہی ہے۔ اس بات کا جواب دیتے ہوئے ویدانت پٹیل نے کہا کہ امریکا ’تمام مناسب مدد فراہم کرنے کے لیے تیار ہے‘۔
ویدانت پٹیل نے کہا کہ امریکا یہ توقع کرتا ہے کہ پاکستانی حکام شفاف و منصفانہ ٹرائل یقینی بنائے گا جو ان تمام مذکورہ ملزمان کا حق ہے۔
ترجمان نے کہا کہ امریکا خدیجہ شاہ کے کیس کی پیروی کر رہا ہے اور پاکستانی حکام سے ان تک قونصلر رسائی کے لیے کہہ چکا ہے۔ انہوں نے مزید کہا کہ خدیجہ شاہ دوہری شہریت رکھتی ہیں اس لیے امریکا اس پر حکومت پاکستان کے ساتھ براہ راست بات چیت جاری رکھے ہوئے ہیں۔
پاکستان میں رجیم چینج کی مبینہ سازش پر امریکی ترجمان کا تبصرہ
سابق وزیراعظم پاکستان عمران خان کی حکومت تبدیل کرنے کے لیے ملک کے سابق آرمی چیف جنرل (ر) قمر جاوید باجوہ اور امریکا کے درمیان کسی مبینہ سازش کی حقیقت کے بارے میں پوچھے گئے سوال کے جواب میں امریکی محکمہ خارجہ کے ترجمان ویدانت پٹیل نے کہا کہ ’وہ الزامات بالکل جھوٹے ہیں۔‘
ویدانت پٹیل نے کہا کہ پاکستان کی سیاست کے بارے میں کچھ طے کرنا پاکستانی عوام کا کام ہے۔ امریکی محکمہ خارجہ کے ترجمان کا کہنا تھا کہ امریکا پہلے کی طرح اب بھی ایک خوشحال اور جمہوری پاکستان کو اپنے مفادات کے لیے انتہائی اہم سمجھتا ہے۔
