انتخابی وعدوں کو پورا کرنے کی راہ میں رکاوٹ کا عوام بھرپور مقابلہ کریں گے، بنگلہ دیشی وزیراعظم

بنگلہ دیش کے وزیراعظم طارق رحمان نے خبردار کیا ہے کہ حکومت کے فلاحی ایجنڈے اور انتخابی وعدوں کو پورا کرنے کی راہ میں رکاوٹ ڈالنے کی کسی بھی کوشش کا عوام بھرپور مقابلہ کریں گے۔

تقریب سے خطاب کرتے ہوئے وزیراعظم نے کہاکہ حکمران جماعت بی این پی نے 12 فروری کے انتخابات میں عوام سے مینڈیٹ حاصل کیا تھا اور حکومت اپنے وعدوں کو مرحلہ وار پورا کرے گی۔

انہوں نے کہاکہ حکومت خاندانی امدادی کارڈز، کسان کارڈز، ائمہ و مؤذنین کے وظائف اور ملک گیر شجرکاری مہم جیسے اہم منصوبوں پر کام شروع کر چکی ہے۔

طارق رحمان نے الزام عائد کیا کہ ایک چھوٹا گروہ حکومت کے اقدامات کے خلاف منفی پروپیگنڈا اور انتشار پھیلانے کی کوشش کررہا ہے، تاہم عوام ایسی کوششوں کو مسترد کردیں گے۔

انہوں نے کہاکہ اگر کسی نے ان منصوبوں میں رکاوٹ ڈالنے کی کوشش کی تو بنگلہ دیش کے عوام خود ان عزائم کا مقابلہ کریں گے۔

وزیراعظم نے شہریوں پر زور دیا کہ وہ ترقیاتی منصوبوں، نہروں کی بحالی، خواتین میں فیملی کارڈز کی تقسیم اور کسانوں کی معاونت کے پروگراموں کو کامیاب بنانے کے لیے ہوشیار اور متحد رہیں۔

وزیراعظم نے کہاکہ روزگار کے مواقع پیدا کرنا اور ملک کی تعمیرِ نو حکومت کی اولین ترجیحات میں شامل ہیں۔

ان کا کہنا تھا کہ حکومت عوام کی زندگی بہتر بنانے کے لیے کام جاری رکھے گی جب تک عوام اس کا ساتھ دیتے رہیں گے۔

بعد ازاں چند پور گورنمنٹ کالج گراؤنڈ میں ایک اور تقریب سے خطاب کرتے ہوئے طارق رحمان نے سیاسی عدم استحکام پیدا کرنے کی کوششوں پر تنقید کی۔

انہوں نے کہاکہ سیاست کا مقصد زرعی پیداوار میں اضافہ، صنعتوں کا قیام، صحت کی سہولیات اور عوامی تحفظ کو یقینی بنانا ہے۔

انہوں نے خبردار کیاکہ اگر کسی نے سیاست کے نام پر انتشار پھیلانے کی کوشش کی تو عوام خاموش نہیں رہیں گے۔

وزیراعظم نے ویڈیو کانفرنس کے ذریعے 20 اضلاع میں فیملی کارڈ تقسیم پروگرام کا بھی افتتاح کیا، جبکہ تقریب کے دوران 10 خواتین میں خود فیملی کارڈز تقسیم کیے۔

ان تقریبات میں ہزاروں پارٹی کارکنوں، رہنماؤں اور حامیوں نے شرکت کی، جبکہ متعدد وزرا، مشیر اور ارکان پارلیمنٹ بھی موجود تھے۔