گزشتہ ایک برس کے دوران برطانیہ اور دیگر 9 اتحادی ممالک نے یوکرین کے 17 ہزار سے زائد ریکروٹس کو روسی حملوں کے خلاف لڑنے کی فوجی تربیت دی ہے۔
برطانوی وزارتِ دفاع کے مطابق تربیتی پروگرام میں ہتھیار چلانے، میدانِ جنگ میں ابتدائی طبی امداد اور گشت کی حکمتِ عملی سمیت دیگر کئی امور کی تربیت دی گئی ہے۔ 2024 تک 30 ہزار یوکرینی ریکروٹس کو تربیت فراہم کی جائے گی۔ تربیتی پروگرام میں برطانیہ کے ساتھ کینیڈا، آسٹریلیا، نیوزی لینڈ، ناروے، فن لینڈ، سوئیڈن، ڈنمارک، لتھوانیا اور نیدرلینڈز بھی شامل ہیں۔
یوکرینی ریکروٹس کا تعلق زندگی کے مختلف شعبوں سے تھا، جن کے پاس کوئی فوجی تجربہ نہیں تھا، جنہیں 5 ہفتوں کے نہایت سخت اور محنت طلب تربیتی پروگرام سے گزارا گیا۔ وزارت دفاع کا کہنا تھا کہ اس پروگرام نے ریکروٹس کو عام شہریوں سے ماہر فوجیوں میں تبدیل کر دیا ہے۔
آپریشن انٹر فلیکس نامی تربیتی پروگرام برطانیہ کی زیر قیادت آگے بڑھایا جا رہا ہے۔ برطانیہ کے وزیر دفاع بین والیس نے کہا کہ برطانوی سرزمین پر آنے والے یوکرینی ریکروٹس کا عزم اور لچک قابل دید تھی، برطانیہ اور ہمارے بین الاقوامی شراکت دار یہ اہم مدد فراہم کرتے رہیں گے، جس سے یوکرین کو روسی جارحیت کے خلاف دفاع میں مدد ملے گی۔
