ایشین رگبی چیمپئن شپ کے میچز کھیلنے کے لیے متحدہ عرب امارات کی ٹیم لاہور پہنچ گئی

ایشیا رگبی کی جانب سے رگبی چیمپئن شپ مینز ڈویژن ون کے لیے مقرر کیے گئے میچز کھیلنے کے لیے متحدہ عرب امارات کی ٹیم لاہور پہنچ گئی، پاکستان دو میچوں کی دلچسپ سیریز میں متحدہ عرب امارات (یو اے ای) کی میزبانی کرے گا، دونوں ٹیموں کے درمیان میچز 4 اور 8 جولائی کو لاہور کے مشہور پنجاب اسٹیڈیم میں ہوں گے۔

مہمان ٹیم کے لاہور پہنچنے پر پاکستان رگبی یونین کے عہدیداران نے انکا استقبال کیا، ٹیم کو ایئرپورٹ سے ہوٹل پہنچا دیا گیا۔ یواے ای کی ٹیم میں 26 کھلاڑی اور چار آفیشلز شامل ہیں۔

ایشین رگبی چیمپیئن شپ ڈویژن ون کو سپر وائز کرنے کے لیے ہانگ کانگ، سنگاپور اور ملائشیا کے میچ آفیشلز بھی لاہور پہنچ گئے ہیں۔

میچز رات 8 بجے کھیلے جائیں گے، 4 جولائی کو ہونے والے میچ میں ہانگ کانگ کے مورگن وائٹ میچ ریفری ہوں گے، سنگا پور رگبی فیڈریشن کے جسٹ وانگ اور ملائشیا کے عبد المنیم میچ میں انکے نائب ہوں گے۔

قطر رگبی فیڈریشن کے پیٹر ہڈسن اور اکہیسا آسو میچ آفیشلز کی کارکردگی کا جائزہ لینے والے کے طور پر کام کریں گے۔

اسی طرح 8 جولائی کو ہونے والے میچ میں سنگا پور رگبی فیڈریشن کے جسٹ وانگ میچ ریفری ہوں گے جبکہ عبدالمنیم اور مورگن وائٹ میچ میں انکے نائب ہوں گے۔

ایشیا رگبی کی جانب سے رضوان ملک کو پورے ٹورنامنٹ کے لیے سائٹنگ کمشنر مقرر کیا گیا ہے۔

ایشیا رگبی کے مطابق تمام آفیشلز کا انتخاب پینل نے ایشیا رگبی ریفریز کمیٹی اورعبوری سی ای او کی منظوری کے بعد کیا ہے، تمام آفیشلز کا کام ٹورنامنٹ میں تجربہ اور مہارت سے اس بات کو یقینی بنانا ہے کہ میچز منصفانہ، عالمی قوانین کے مطابق اور اعلیٰ معیار کو برقرار رکھتے ہوئے منعقد کیے گئے ہیں۔