گلگت بلتستان میں پی ٹی آئی کے منحرف اراکین کو شو کاز نوٹس جاری

پاکستان تحریک انصاف (پی ٹی آئی) کی جانب سے گلگت بلتستان میں وزیر اعلٰی کے انتخاب کے دوران پارٹی پالیسی سے انحراف کرنے والے پی ٹی آئی نمائندوں کو شوکاز نوٹس جاری کردیا گیا ہے۔

پی ٹی آئی کے مرکزی میڈیا ڈیپارٹمنٹ کی جانب سے جاری کردہ تفصیلات کے مطابق شوکاز نوٹس ایم ایل اے گلگت بلتستان فتح اللہ خان اور حشمت اللہ خان کے نام جاری کیا گیا ہے۔

جاری کردہ نوٹس کے مطابق پارٹی قیادت نے شو کاز میں شامل منحرف ارکان پرعدم اعتمادی کا اظہار کیا اور کہاکہ قیادت کے علم میں ہے کہ ان افراد نے پارٹی کے فیصلے کے خلاف ووٹ دیا ہے اور گلگت بلتستان میں الیکشن کے دوران پارٹی کے خلاف سازش میں ملوث ہونے کی اطلاعات بھی موصول ہوئی ہیں۔

نوٹس کے مطابق تمام افراد کو پارٹی کی جانب سے تین روز کے اندر تحریری طور پر وضاحت پیش کرنے کی ہدایت کی جاتی ہے، جواب نہ ملنے یا غیر تسلی بخش ہونے کی صورت میں پارٹی پالیسی اور قواعد کے مطابق مزید کارروائی کی جائے گی۔

واضح رہے رواں ہفتے 13 جولائی کو پاکستان تحریک انصاف نے وزیراعلٰی گلگت بلتستان کے انتخاب کا بائیکاٹ کیا، جس پر تحریک انصاف کے ہی فارورڈ بلاک کے رکن حاجی گلبر خان وزیر اعلٰی گلگت بلتستان منتخب ہوگئے۔