3 مہینے تک کتے بیلا کیساتھ کھلے سمندر میں بھٹکنے والے آسٹریلوی ملاح اور کتے کو بچا لیا گیا ہے۔ ملاح بحرالکاہل میں پھنسا رہا اور بارش کا پانی پی کر اور کچی مچھلی کھانے کی وجہ سے جان بچانے میں کامیاب رہا۔
آسٹریلوی نیوز ایجنسی ’نائن نیوز‘ سے گفتگو میں 51 برس کے آسٹریلوی ملاح ٹِم شیڈوک نے بتایا کہ بہت کم کھانا کھانے اور پانی پینے کے باوجود بہت اچھا محسوس کر رہا ہوں، میں سمندر میں بہت مشکل آزمائش سے گزرا ہوں، مجھے صرف آرام اور اچھی خوراک کی ضرورت ہے کیونکہ میں اتنے عرصے سے سمندر میں اکیلا رہا ہوں۔
ٹم شیڈوک اور اس کے کتے ’بیلا‘ نے اپریل میں میکسیکو کے ساحلی شہر ’لاپاز‘ سے سفر کیا اور فرانسیسی پولینیشیا میں ڈاک کرنے سے پہلے 6 ہزار کلومیٹر کا سفر طے کرنے کا منصوبہ بنایا تھا۔لیکن بپھری سمندری لہروں نے کشتی کو نقصان پہنچایا اور اس کے الیکٹرانک آلات بھی ناکارہ ہو گئے اور وہ بحرالکاہل میں بھٹک گئے۔
An Australian sailor and his dog have been rescued off the coast of Mexico after spending three months at sea. @LaurenTomasi #9News pic.twitter.com/HDipZfsgzf
— 9News Melbourne (@9NewsMelb) July 15, 2023
گزشتہ دنوں ایک ہیلی کاپٹر نے ان کی سمندر میں موجودگی سے آگاہ کیا، جس کے بعد مچھلیوں کا شکار کرنے والے بحری جہاز نے انہیں ریسکیو کیا تھا۔ بحری جہاز پر موجود ڈاکٹر نے ’نائن نیوز‘ کو بتایا کہ ٹم کی صحت ٹھیک ہے تاہم صحت کی صورتحال کے پیش نظر وہ کم مقدار میں کھانا کھا سکتے ہیں۔
ٹم شیڈوک اور ’بیلا‘ کو ریسکیو کرنے والا بحری جہاز میکسیکو کی جانب واپسی پر ہے، جہاں ٹم شیڈوک کے طبی ٹیسٹ کیے جائیں گے اور ضرورت پڑی تو انہیں علاج کی سہولیات فراہم کی جائیں گی۔