خیبرپختونخوا کے ضلع سوات کے سیاحتی مقام مالم جبہ میں دو روزہ نیشنل اِسکی اینڈ سنو بورڈنگ چیمپیئن شپ کا آغاز ہو گیا ہے۔ رنگا رنگ سنو فیسٹول میں پاکستان بھر سے 100 سے زائد کھلاڑی حصہ لے رہے ہیں۔ اس دو روزہ قومی چیمپین شپ میں اِسکی اور سنو بورڈنگ مقابلوں کے ساتھ ثقافتی اور کھانے پینے کی اشیا کے اسٹالز بھی لگائے گئے ہیں۔
سیاحوں کی تفریح کے لیے میوزیکل نائٹ اور شاندار آتش بازی کا بھی اہتمام کیا گیا ہے۔
نیشنل اِسکی اینڈ سنو بورڈنگ چیمپیئن شپ ہر سال مالم جبہ میں منعقد کی جاتی ہے جس میں پاکستان سمیت دنیا بھر سے غیر ملکی سیاح شرکت کرتے ہیں۔
اس سال بھی بڑی تعداد میں ملکی اور غیر ملکی سیاح اس فیسٹیول میں شریک ہورہے ہیں۔ فیسٹیول کے انعقاد سے سیاح بھی خوب لطف اندوز ہو رہے ہیں۔
فیسٹیول میں شریک سیاحوں کے مطابق وادی سوات میں اس نوعیت کی سرگرمیوں کا انعقاد اس بات کا واضح ثبوت ہے کہ یہ علاقے پرامن ہیں۔ منتظمین کی کاوشوں کی وجہ سے علاقہ میں عالمی سطح کے مقابلوں کا انعقاد پورا سال جاری رہتے ہیں۔
