براڈ شیٹ کمپنی کی جانب سے پاناما پیپرز لیکس کی تحقیقات کے لیے قائم کردہ مشترکہ تحقیقاتی ٹیم (جے آئی ٹی) کی رپورٹ کا والیوم 10 جاری کرنے کی آئینی درخواست سماعت کے لیے مقرر کردی گئی ہے۔
چیف جسٹس عمرعطا بندیال کی سربراہی میں 2 رکنی بینچ 22 اگست کو سماعت کرے گا۔ بینچ میں جسٹس اطہر من اللّٰہ بھی شامل ہیں۔ اس ضمن میں عدالت نے اٹارنی جنرل سمیت دیگر فریقین کو نوٹس جاری کردیے ہیں۔
واضح رہے کہ رواں ماہ کے آغاز پر سپریم کورٹ نے براڈ شیٹ کمپنی کی جانب سے پاناما کیس کے ضمن میں تشکیل کردہ جے آئی ٹی کی رپورٹ کے والیوم 10 کی نقول حاصل کرنے سے متعلق درخواست کی سماعت کے دوران نیب اور اٹارنی جنرل کو نوٹسز جاری کیے تھے۔
درخواست گزار براڈ شیٹ کمپنی نے موقف اختیار کیا تھا کہ کمپنی نے شریف خاندان کی غیر ملکی جائیدادوں کی تلاش میں نیب کی معاونت کی لیکن نیب نے اس کا معاوضہ ادا نہیں کیا۔ درخواست گزار براڈ شیٹ کمپنی نے برطانیہ کی ایک عدالت میں نیب کے خلاف واجبات کے حصول کے لیے مقدمہ دائر کر رکھا ہے۔
براڈ شیٹ کمپنی نے سپریم کورٹ سے چیئرمین نیب کو پانامہ پیپرز لیکس کیس کی جے آئی ٹی رپورٹ کا والیوم 10 فراہم کرنے کا حکم جاری کرنے کی استدعا کی تھی۔ براڈشیٹ کمپنی پانامہ جے آئی ٹی والیوم 10 کو برطانوی عدالت میں اسے بطور ثبوت پیش کرنا چاہتی تھی۔
سپریم کورٹ میں گزشتہ سماعت کے دوران درخواست گزار کمپنی کے وکیل لطیف کھوسہ نے بتایا تھا کہ اس حوالے سے لندن میں کیس کی سماعت جاری ہے اور گزشتہ سماعتیں 16 سے 19 جولائی تک ہوچکی ہیں۔
لطیف کھوسہ کے مطابق لندن کی عدالت سپریم کورٹ کے فیصلے کی منتظر ہے، عدالت کا کہنا ہے کہ پاکستانی سپریم کورٹ کے فیصلے کے بعد لندن کی عدالت اس کیس میں کوئی فیصلہ کرے گی۔
