لاہور ہائیکورٹ: پرویز الٰہی کو کسی بھی خفیہ مقدمہ میں گرفتار نہ کرنے کا فیصلہ بحال

لاہور ہائی کورٹ نے سابق وزیراعلیٰ پنجاب پرویز الٰہی کو کسی بھی خفیہ مقدمہ میں گرفتار نہ کرنے کا سنگل بینچ کا فیصلہ بحال کر دیا ہے اور پنجاب حکومت کی رٹ خارج کر دی ہے۔

عدالت العالیہ میں صدر پاکستان تحریک انصاف کو خفیہ مقدمات میں حفاظتی ضمانت دینے کے معاملے پر کیس کی سماعت ہوئی ہے۔

پنجاب حکومت کی جانب سے سنگل بینچ کے فیصلے کے خلاف اپیل پر سماعت کے دوران عدالت کی جانب سے وکلا کے دلائل مکمل ہونے پر فیصلہ سنایا گیا۔

ہائیکورٹ نے حکومت کی اپیل خارج کر دی، جس سے سابق وزیراعلیٰ پنجاب پرویزالٰہی کو کسی بھی خفیہ مقدمہ میں گرفتار نہ کرنے کا فیصلہ بحال ہو گیا۔

لاہور ہائی کورٹ کے جج جسٹس محمد وحید خان کی سربراہی میں دو رکنی بینچ نے سماعت کی۔

واضح رہے کہ پنجاب حکومت نے سنگل بینچ کے فیصلے کے خلاف لاہور ہائیکورٹ سے رجوع کیا تھا۔