امریکی ریاست نیو جرسی میں ساحل سمندر سے ایک ایسا پیغام ملا ہے جسے آئر لینڈ سے کانچ کی بوتل میں بند کر کے سمندر میں پھینک دیا گیا تھا، پیغام کس کے لیے ہے اور اسے 4 سال قبل بھیجنے والا کون ہے؟، اس کی سوشل میڈیا کے ذریعے تلاش شروع کر دی گئی ہے۔
پرانے وقتوں میں لوگ کبوتر کے ذریعے پغام رسانی کیا کرتے تھے، کبوتر میلوں دور کسی کا پیغام پہنچایا کرتے تھے لیکن زمانہ تبدیل ہوا، ڈاک کا نظام متعارف ہوا، پھر زمانہ اس سے بھی آگے چلا تو ٹیکنالوجی اور انٹرنیٹ کی دریافت نے پیغام رسانی کا سارا نظام ہی بدل کر رکھ دیا، اب میلوں دور آپ کو کسی تک اپنا پیغام پہنچانے میں سیکنڈ بھی درکار نہیں ہوتا۔
ٹیکنالوجی کے اس جدید دور میں بھی کچھ لوگ ایسے ہیں جو پیغام رسانی کے لیے انوکھا طریقہ استعمال کرتے ہیں، ایسی ہی ایک مثال نیو جرسی میں اس وقت سامنے آئی جب یہاں ساحل سمندر پر جمع ہونے والے کچرے کی صفائی کرنے والے ایک خاندان کو ایک بوتل ملی جس میں ایک پیغام رکھا گیا تھا اور اسے آج سے 4 سال قبل آئر لینڈ سے سمندر کے حوالے کیا گیاتھا۔
ساحل سمندر پر چلنے والے فرینک بولگر نے بتایا کہ وہ وائلڈ ووڈ اسٹریٹ 14 کے بیچ کے کنارے اپنی اہلیہ کیرن اور پوتی آتمن کے ساتھ چہل قدمی کر رہے تھے کہ انہیں ایک بوتل پر نظر پڑی جس کے اندر ایک پرچی موجود تھی۔
بولگر کا کہنا ہے کہ ‘ہمیں یہ بوتل ساحل سمندر پر پڑے کچرے سے ملی۔ہم نے اسے اٹھا لیا اور گھر لے جانے کا ارادہ کیا تاکہ یہ معلوم کیا جا سکے کہ بوتل کے اندر پڑی ہوئی کاغذ کی پرچی پر کیا لکھا ہے؟ یا یہ کاغذ کا ٹکڑا کس مقصد کے لیے بوتل میں رکھا گیا ہے؟۔
بولگر کا کہنا ہے کہ اس راز کی تلاش میں انہوں نے بوتل پر لگے مضبوط کاک کو ہٹایا تو اندر سے انہیں ایک تحریر ملی جو 17 جولائی 2019 کو لکھی گئی تھی اور اس پر ‘اوئیف’ نامی شخص کے دستخط تھے۔
نوٹ میں لکھا ہے گیا ہے کہ ‘آئرلینڈ کی جانب سے سلام۔‘ میں نے اس بوتل کو سمندر میں پھینک دیا ہے تاکہ یہ کسی کو دوسرے دن مل سکے۔ شاید یہ افریقہ جا پہنچے یا آئس لینڈ تک کا سفر کرے! مجھے نہیں معلوم کہ یہ کسی کو مل گیا ہے، لیکن مجھے امید ہے کہ یہ کسی کو اب مل گیا ہے!
بولگر نے بوتل میں بند اس پیغام کو ایک مقامی میگزین کے حوالے کر دیا۔ میگزین نے اس پیغام کے لکھنے والے کی تلاش کے لیے فیس بک پر تصاویر کے ساتھ شیئر کر دیا۔
