پشاور زلمی کے فینز کا انتظار ہوا ختم ۔ رواں ماہ کے پہلے ہفتے میں جھلک دکھانے کے بعد پشاور زلمی نے پاکستان سپر لیگ سیزن 8 کے لیے اپنے ترانہ کی ویڈیو بالآخر جمعہ کو جاری کردی ۔
پشاور زلمی کے یوٹیوب چینل سے جاری کردہ ’زلمی رعالل‘ اپنی ریلیز کے فوراً بعد وائرل ہوگیا۔ جمعہ کی شام تک اسے 62 ہزار سے زائد صارفین دیکھ چکے تھے۔
پشاور زلمی کے اس ترانے کی دھن نوٹی بوائے نے ترتیب دی ہے جبکہ اسے بلال، ظہور اور نیس کیفے بیسمنٹ سے شہرت پانیوالے گلوکار التمش نے گایا ہے۔
ترانہ کی ویڈیو میں جہاں پشاور زلمی کے برینڈ ایمبیسڈر حمزہ علی عباسی اور اداکارہ ماہرہ خان ایک بار پھر جلوہ گر ہوئے ہیں وہیں زلمی ٹیم میں شامل ہونیوالے مایہ ناز پاکستانی بلے باز اور قومی ٹیم کے کپتان بابر اعظم اور زلمی کے ہیڈ کوچ ڈیرن سیمی بھی دیکھے جاسکتے ہیں۔
ایک نظر میں ’زلمی رعالل‘ پشاور زلمی کے چھٹے ترانے Kingdom سے غیرمعمولی مماثلت کا تاثر چھوڑتا ہے لیکن ظہور کے پشتو کورس نے اسے انتہائی دلچسپ بنادیا ہے۔ بلال کی فی البدیہہ گلوکاری اور التمش کے الاپ نے اسے مزید جدت سے ہمکنار کیا ہے۔
ترانے میں خماریاں نے خوبصورتی کے ساتھ رباب کی آمیزش کرتے ہوئے سامعین کو خیبرپختونخوا صوبہ کے قدرتی حسن سے مالامال مقامات کے مناظر سے ہم آہنگ کیا ہے۔ ناقدین کے مطابق ’زلمی رعالل‘ Kingdom نہیں اور اسے Kingdom ہونا بھی نہیں چاہیے۔
