سوشل میڈیا پر جھوٹی مہم چلانے سے متعلق اداکارہ مہوش حیات اور کبریٰ خان کی یوٹیوبرعادل فاروق راجہ کے خلاف درخواست کی سماعت کے دوران تفتیشی افسر نے عدالت کو بتایا ہے کہ مبینہ ویڈیوز کو فرانزک ٹیسٹ کے لیے اسلام آباد کی لیبارٹری بھجوا دیا گیا ہے۔
سندھ ہائیکورٹ میں اداکاراؤں کی درخواست پر سماعت کے دوران ایف آئی اے کے تفتیشی افسر نے عدالت کو بتایا کہ اداکارہ مہوش حیات نے چہرے کی شناخت کے لیے درخواست دی تھی، اداکارہ نے دعویٰ کیا تھا کہ ویڈیو میں نظر آنے والا چہرہ ان کا نہیں۔
تفتیشی افسر نے مزید بتایا کہ کراچی میں فرانزک ٹیسٹ کی سہولت موجود نہیں اس لیے ویڈیوز کو اسلام آباد کی فرانزک لیبارٹری بھیجا گیا ہے۔عدالت نے اسفتسار کیا کہ اسلام آباد سے رپورٹ کب تک موصول ہوگی؟ جس پر تفتیشی افسر نے عدالت سےاستدعا کی کہ فرانزک رپورٹ جمع کرانے کے لیے 4ہفتے کی مہلت دی جائے۔
تفتیشی افسر نے اپنے بیان میں مزید بتایا کہ سوشل میڈیا پر مہوش حیات اور کبریٰ خان کے خلاف تمام لنکس بلاک کردیے ہیں جبکہ ٹوئٹر انتظامیہ کا تاحال جواب موصول نہیں ہوا۔
سندھ ہائیکورٹ نے درخواستوں کی سماعت 4ہفتے کے لیے ملتوی کردی۔ گزشتہ سماعت پر عدالت نے ڈپٹی ڈائریکٹر سائبر کرائم کو طلب کرتے ہوئے تفتیشی افسر کو رپورٹ کے ساتھ پیش ہونے کا حکم دیا تھا۔
واضح رہے اداکارہ مہوش حیات اور کبریٰ خان نے اپنی درخواست میں مؤقف اپنایا تھا کہ یو ٹیوبر عادل راجا نے میڈیا انڈسٹری کی 4 نامور اداکاراؤں کے خلاف جھوٹے الزامات لگا کر ان کی تذلیل کی۔
درخواست میں کہا گیا تھا کہ جھوٹے اور من گھڑت الزامات سے اداکاراؤں کی عزت اور وقار کو مجروح کیا گیا۔ بعد ازاں یوٹیوبر عادل فاروق راجہ نے ایک ویڈیو میں وضاحت کی اور اپنے مؤقف سے مکر گئے مگر اس دوران اداکاراؤں کی ساکھ کو ناقابل تلافی نقصان پہنچا۔
درخواست میں مزید کہا گیا تھا کہ ہتک آمیز مواد کو ہٹانے کے لیے ایف آئی اے اور پی ٹی اے سے رابطہ کیا گیا ہے لیکن یوٹیوب کے خلاف کوئی کارروائی نہیں کی گئی۔
