کمانڈر 12 کور کی ہدایت پر قانون نافذ کرنے والے اداروں نے بلوچستان میں انسداد منشیات آپریشن کا آغاز کردیا ہے۔ بلوچستان کے علاقے قلعہ عبداللہ اور پشین میں منشیات کے خلاف بھر پور کاروائیاں جاری ہیں۔
ہفتے کی صبح قلعہ عبداللہ آپریشن کے تسلسل میں پشین میں بھی منشیات کے گوداموں پر لیویز کی جانب سے کاروائیاں عمل میں لائی گئیں۔ اس دوران منشیات بنانے والی 9 فیکٹریاں اور گودام پر چھاپہ مارا گیا۔
منشیات برآمد ہونے پر تمام فیکٹریاں اور گودام نذر آتش کردیے گئے۔ ان گوداموں اور فیکٹریوں میں کروڑوں روپے مالیت کی تیار اور ذخیرہ کی گئی منشیات کو بھی نذر آتش کیا گیا ہے۔
کمشنر کوئٹہ محمد حمزہ شفقات کا متعلقہ علاقے کا دورہ آپریشن کا جائزہ لیا۔ اس دوران کمشنر کوئٹہ کو ڈپٹی کمشنر پشین کیپٹن (ر)جمیل بلوچ نے آپریشن سے متعلق بریفنگ دی۔ کمشنر کوئٹہ ڈویژن حمزہ شفقات نے کہا کہ منشیات کے کاربار میں ملوث عناصر اور انکے ٹھکانوں کا قلع قمع کرنے میں کوئی کسر نہیں چھوڑی جائے گی۔
قانون نافذ کرنے والے اداروں کو اس آپریشن میں مقامی قبائل کی بھرپور تائید و حمایت حاصل ہے اور علاقہ مکینوں نے ان کارروائیوں کا خیر مقدم کیا ہے۔
