پیسکو کا بجلی چوری کے خلاف گرینڈ آپریشن، ایک کروڑ سے زائد کے جرمانے عائد

پشاور الیکٹرک سپلائی کمپنی (پیسکو) کی جانب سے بجلی چوری کے خلاف گرینڈ آپریشن کا آغاز ہو چکا ہے، جس کے مطابق اب تک 700 سے زائد کنڈے ہٹا لیے گئے ہیں جبکہ ایک کروڑ 50 لاکھ روپے سے زائد کے جرمانے بھی عائد کیے جا چکے ہیں۔

ترجمان پیسکو کے مطابق پشاور میں 215، خیبر میں 109، مردان میں 66، ہزارہ میں 120 کنڈے ہٹائے گئے، سوات میں 94، بنوں میں 40، اور صوابی میں 40 کنڈے ہٹائے گئے۔

ترجمان کے مطابق بجلی چوری میں ملوث 400 سے زائد افراد کے خلاف ایف آئی آر کے اندراج کے لیے درخواست جمع کر دی گئی ہے۔ متعدد بجلی چوروں کو موقع پر گرفتار کرکے پولیس کے حوالے کر دیا گیا ہے۔

پیسکو ترجمان نے بتایا کہ بجلی چوروں سے نمٹنے کے لیے ضلعی انتظامیہ کی جانب سے سیکیورٹی فراہم کی جارہی ہے جس کے بعد کارروائی میں اضافے سے کئی بجلی چور رضاکارانہ طور پر کنڈے ہٹانے لگے ہیں۔

ترجمان پیسکو کے مطابق پیسکو صارفین بجلی چوری کی اطلاع 118 پر کال کرکے دے سکتے ہیں تاکہ بجلی چوروں کے خلاف کارروائی کرکے بجلی کی چوری کو بچایا جا سکے۔