کراچی کے علاقے کلفٹن دوتلوار کے قریب زمزمہ میں واقع خالی بنگلے سے ایک شخص کی کئی روز پرانی نعش ملی ہے۔
ڈپٹی انسپکٹر جنرل (ڈی آئی جی) ساؤتھ سید اسد رضا کے مطابق بنگلہ خالی تھا یہاں آباد فیملی کبھی کبھار رہنے کے لیے آتی تھی، بظاہر لگتا ہے کہ مرنے والا نشے کا عادی تھا۔
ڈی آئی جی ساؤتھ نے مزید بتایا ہے کہ مرنے والے شخص کی تاحال شناخت نہیں ہوئی، شبہ ہے کہ مرنے والا چوری کی نیت سے بنگلے میں آیا تھا، موت کی وجہ جاننے کے لیے نعش کو پوسٹ مارٹم کے لیے جناح اسپتال منتقل کر دیا گیا ہے ۔
سید اسد رضا نے مزید بتایا ہے کہ پوسٹ مارٹم رپورٹ موصول ہونےکےبعد اصل حقائق سامنے آئیں گے، اس وقت صرف جائے وقوعہ کا جائزہ لینے کے بعد محض قیاس آرائی ہی کی جا سکتی ہے۔
ادھر ایس ایس پی ساوتھ عمران قریشی کے مطابق کلفٹن پولیس نے موقع پر پہنچ کر معاملے کی تحقیقات شروع کر دی ہیں، ابتدائی تحقیقات کے مطابق ملنے والے انسانی ڈھانچہ کی جنس معلوم نہیں ہو سکی۔
ایس ایس پی ساؤتھ کے مطابق مذکورہ گھر محمد احمد اسلم نامی شخص کی ملکیت ہے اور وہ گزشتہ 7 ماہ سے بند ہے، محمد احمد اسلم نے اس گھر کو پراپرٹی سیل پرچیز کی غرض سے خریدا تھا۔
