چیف جسٹس آف پاکستان جسٹس عمر عطابندیال کی سربراہی میں 9 رکنی لارجر بنچ آج سماعت کرے گا ۔ جسٹس اعجاز الاحسن اور جسٹس مظاہر علی اکبر نقوی نے از خود نوٹس کے لیے معاملہ چیف جسٹس کو بھیجا تھا۔
سپریم کورٹ سے جاری اعلامیے میں کہا گیا تھا کہ علم میں لایا گیا ہے کہ دو صوبائی اسمبلیاں تحلیل ہوئے ایک ماہ ہوگیا ہے۔از خود نوٹس میں دیکھا جائے گا کہ انتخابات کی تاریخ دینا کس کا اختیار ہے ؟ ۔
چیف جسٹس عمر عطابندیال ،جسٹس منصور علی شاہ،جسٹس یحیٰ آفریدی،جسٹس اطہرمن اللہ،جسٹس منیب اختر، جسٹس محمد علی مظہر،جسٹس جمال خان مندوخیل، جسٹس اعجاز الاحسن اورجسٹس سید مظاہر علی اکبر نقوی بھی بنچ کاحصہ ہیں۔
اعلامیے کے مطابق سپریم کورٹ کا ازخود نوٹس تین سوالات پر لیا گیا ۔ پہلا: ازخودنوٹس میں دیکھا جائے گا کہ انتخابات کی تاریخ دینا کس کا اختیار ہے؟۔ دوم: دیکھاجائے گا کہ انتخابات کرانےکی آئینی ذمہ داری کس نے اورکب پوری کرنی ہے؟ ۔سوم: دیکھاجائے گا کہ فیڈریشن اور صوبوں کی آئینی ذمہ داری کیا ہے؟۔
پنجاب اور خیبرپختونخوا کے انتخابات کی تاریخ کے لیے اسلام آباد ہائیکورٹ بار ایسوسی ایشن اور سپیکر پنجاب اور خیبرپختونخوا اسمبلی کی انتخابات کے لیے دائر درخواستیں بھی سماعت کے لیے مقرر۔دونوں درخواستوں پر سماعت سپریم کورٹ کے ازخود نوٹس کے ساتھ ہوگی۔
