رحیم یار خان میں رکن پور کے قریب موٹروے ایم-5 پر ٹریفک حادثے کے نتیجے میں 13 افراد جاں بحق جبکہ 20 زخمی ہوگئے۔
ڈان نیوز کی رپورٹ کے مطابق مقامی افراد، ریسکیو اور پولیس حکام کے مطابق جمعہ کی رات رحیم یار خان میں رکن پور کے قریب موٹروے ایم-5 پر ایک سوزوکی پک اپ وین مسافروں کو لے کر کراچی جارہی تھی کہ محمد پور کے علاقے تھل حسن کے قریب اس کا ٹائر پھٹ گیا اور وہ الٹ گئی۔
حادثہ دیکھ کر ملتان سے آنے والی بس رک گئی اور اس کے مسافر حادثے کا شکار سوزوکی پک اپ کے حادثے میں زخمی ہوجانے والے افراد کی مدد کو اترے۔
مسافروں کی امدادی کارروائی کے دوران محکمہ کسٹم کی سرکاری لیکسز گاڑی ان مسافروں پر چڑھ دوڑی اور الٹ گئی جس کے نتیجے میں 5 افراد موقع پر ہی دم توڑ گئے۔
ڈسٹرکٹ پولیس افسر رضوان عمر گوندل نے کے مطابق زخمیوں میں 14 افراد کی حالت تشویشناک ہے جبکہ جاں بحق ہونے والے افراد کی میتوں کو ان کے آبائی علاقے روانہ کردیا گیا ہے اور زخمیوں کو نے شیخ زید ہسپتال پہنچایا گیا ہے۔
رضوان عمر گوندل کا کہنا ہے کہ حادثے کا شکار ہونے والی سرکاری گاڑی میں سوار فیملی خطرے سے باہر ہے۔
ڈپٹی کمشنر اور ڈی پی او نے شیخ زید ہسپتال کا دورہ کر کے مریضوں کی عیادت اور اور انتظامات کی نگرانی کی اور زخمیوں کو ہر طرح کی بہترین طبی سہولیات فراہم کرنے کا حکم دیا۔
موٹر وے پولیس بھی موقع پر پہنچ گئی، موٹروے پولیس حکام کا کہنا ہے کہ حادثے کے ذمہ داران کا تعین کیا جارہا ہے۔
نیشنل ہائی وے اینڈ موٹروے پولیس کے مطابق حادثہ اتنا اچانک تھا کہ موٹروے پولیس فوری طور پر سڑک پر حفاظتی کونز نہیں لگاسکی جس کے باعث گاڑی کے ڈرائیور کو اندازہ نہیں ہوا کہ کس لین میں حادثہ ہوا ہے۔
