ایک عظیم کھلاڑی نے کہا تھا ’ریکارڈ بنتا ہی ٹوٹنے کے لیے ہے‘۔ اس بیان کی حقیقت کو ہم اپنی روزمرہ کی زندگی کے ہر شعبے میں روبہ عمل ہوتے دیکھتے ہیں۔ تاہم جسے نت نئے ریکارڈ بننے کا چسکا ہو اس کے لیے یہ بات اور بھی اہم ہوجاتی ہے۔ جی ہاں! ہم بات کررہے ہیں ’ڈیوڈ رش‘ کی، جن کا نام 250 سے زیادہ مختلف اور منفرد اعزازات کے ساتھ گنیز ورلڈ ریکارڈز میں شامل ہے۔
’ڈیوڈ رش‘ نے تازہ ریکارڈ داڑھی میں زیادہ سے زیادہ ’چوپ اسٹیکس‘ پھنسا کر حاصل کیا ہے۔ امریکی ریاست ’ایڈاہو ‘سے تعلق رکھنے والے ’ڈیوڈ رش‘ اپنے ساتھیوں ’ آیڈاہوایی جوئل اسٹراسر‘ اور ’گرٹ اسمتھ‘ کی معاونت سے یہ ریکارڈ بنانے میں کامیاب ہوئے۔
مزید پڑھیں
انہوں نے ایک ایسے مقابلے میں شرکت کی جس میں انہیں ایک منٹ کے دورانیے میں اپنی داڑھی میں زیادہ سے زیادہ ’چوپ اسٹیکس‘ پھنسانا تھیں، اور وہ ساتھیوں کی مدد سے اپنی داڑھی میں 110 چوپ اسٹیکس پھنسانے میں کامیاب رہے یوں انہوں نے یہ ریکارڈ اپنے نام کرلیا۔
’ڈیوڈ رش‘ کے اس کارنامے کو ابھی گنیزورلڈ ریکارڈ کا حصہ نہیں بنایا گیا ہے، اس کو ریکارڈ تسلیم کرنے لیے متعلقہ حکام کی جانب سے اس کارنامے کا جائزہ لینا ابھی باقی ہے۔
واضح رہے کہ اس سے قبل کسی کی مدد کے بغیر اپنی داڑھی میں چوپ اسٹیکس پھنسانے کا ریکارڈ ’ڈیوڈ رش‘ کے ساتھی ’اسٹراسر‘ نے بنایا تھا، وہ مقابلے کے سولو ورژن میں 59 چوپ اسٹیکس داڑھی میں پھنسا کر اول آنے میں کامیاب رہے تھے۔
علاوہ ازیں ’ اسٹراسر‘ کے پاس داڑھی میں سب سے زیادہ ٹوتھ پک اور اسٹرا پھنسانے کے ساتھ ساتھ داڑھی میں سب سے زیادہ باؤبلز لٹکانے کا ریکارڈ بھی ہے۔
