ندا یاسر، فہد مصطفی کو اپنے ’شو‘ میں کیوں نہیں بلاتیں؟

ندا یاسر اور فہد مصطفی، دونوں ہی پاکستانی مارننگ شوز کے بڑے نام ہیں۔ لیکن دیکھنے والوں نے آج تک دونوں میزبانوں کو ایک ساتھ اسکرین پر نہیں دیکھا۔ تاہم یوٹیوبر اور پوڈ کاسٹر احمد علی بٹ کے ساتھ ہونے والے حالیہ انٹرویو میں ندا یاسر نے فہد مصطفی کو اپنے مارننگ شو میں نہ بلانے کی وجہ بتائی ہے۔

پوچھا گیا کہ آخر ان کا اور فہد مصطفی کا کیا مسئلہ چل رہا ہے؟ ندا یاسر نے جواب دیا کہ ان کی فہد مصطفی سے خاندانی دشمنی ہے۔ پھر تھوڑا سنجیدہ ہو کر کہا کہ ان کے خاندان کا آپس کا ایک مسئلہ ہے جو وہ آن ایئر نہیں بتا سکتیں۔

ویڈیو ٹک ٹاک پر وائرل ہوئی تو صارفین کے پاس کہنے کو بہت کچھ تھا۔ کچھ نے اندازا لگایا کہ ندا یاسر کی نند اور فہد مصطفی کے بھائی کی شادی ہوئی تھی کچھ سال پہلے، جو ناکام ثابت ہوئی۔ ایک صارف نے یہ بھی کہا کہ ندا یاسر کے شوہر، یاسر نواز اور فہد مصطفی دونوں سندھی ہیں اس وجہ سے بھی مسئلہ ہوسکتا ہے۔ اس انٹرویو کے بعد سے اب تک فہد مصطفی کا کوئی بیان سامنے نہیں آیا ہے۔ لیکن اصل وجہ کیا ہے یہ تو دونوں ’میزبان‘ ہی بتا سکتے ہیں۔

ندا یاسر پاکستان کی ایک مشہور ترین اداکارہ اور ٹیلی ویژن میزبان ہیں، جو 14 برس سے اے آر وائے پر ’گڈ مارننگ پاکستان‘ کے نام سے پروگرام کر رہی ہیں۔ وہ پاکستان کے ایک نامی گرامی خاندان سے تعلق رکھتی ہیں، کیوں کہ ان کے والد کاظم پاشا پاکستان کے بڑے پروڈیوسرز میں شامل ہیں۔ ندا کی شادی پاکستانی اداکار اور پروڈیوسر یاسر نواز سے ہوئی ہے، اور ان کے 3 بچے ہیں۔