پشاور پولیس نے نئی نویلی دلہن کو شادی کے روز اپنے ہی دلہا کو قتل کرنے کے الزام میں جبکہ اس کے آشنا کو بھی قتل کے اس مقدمہ میں مرکزی ملزم نامزد کرتے ہوئے گرفتار کرلیا ہے۔
پولیس کے مطابق اندھے قتل کا واقعہ گزشتہ اتوار کو تھانہ فقیر آباد کی حدود میں چارسدہ روڈ پر پیش آیا تھا، جہاں بارات کے دوران فائرنگ کرکے دلہے عدنان کو قتل کر دیا گیا تھا جبکہ ساتھ بیٹھی دلہن کو چوٹ بھی نہیں آئی تھی۔
پولیس کے مطابق عدنان انڈسٹریل اسٹیٹ کا رہائشی تھا اور اس کے قتل کی منصوبہ بندی کسی اور نے نہیں بلکہ اس کے ساتھ بیٹھی اس کی دلہن نے کی تھی۔
آشنا کے ساتھ مل کر دلہے کا قتل
ایس ایس پی آپریشنز پشاور کاشف آفتاب عباسی نے دعوٰی کیا کہ پولیس 48گھنٹوں کے اندر اندر قاتلوں تک پہنچ گئی ہے۔ منصوبے کی ماسٹر مائنڈ دلہن اور اس کے آشنا کا بھی سراغ لگا کر دونوں کو گرفتار کر لیا گیا ہے۔
پولیس کی تفتیشی ٹیم نے تکنیکی بنیادوں پرعلاقے کی جیو ٹیگنگ، جیو فینسنگ کیساتھ ساتھ مسلسل استعمال ہونے والے موبائل فونز نمبرز کے ڈیٹا کو جامع تفتیش میں شامل کیا اور تکنیکی بنیادوں پر تفتیش کے دوران ملوث ملزمان کا سراغ لگایا تھا۔
جس کے بعد ملزم جلال ولد فضل مولا مسلم آباد چارسدہ کا رہائشی اور ملزمہ دلہن، جس کا نام نہیں بتایا گیا، گرفتار کرلیا گیا ہے۔
ملزم اور دلہن شادی کرنا چاہتے تھے
ایس ایس پی آپریشن کاشف آفتاب عباسی کے مطابق ملزم کا دلہن کے ساتھ کئی عرصہ سے تعلق تھا اور دونوں آپس میں قریبی رشتہ دار بھی ہیں۔ دونوں آپس میں شادی کرنا چاہتے تھے مگر گھر والے ان کی شادی کے خلاف تھے یہی وجہ تھی کہ لڑکی کی شادی دوسری جگہ طے کردی گئی۔
’جس پر دونوں ملزمان خوش نہیں تھے اور ان کی مسلسل کوششوں کے باوجود جب کسی نے ان کی شادی کی بات نہیں مانی تو دونوں نے مل کر دلہے کو ہی راستے سے ہٹانے کا منصوبہ بنایا تھا۔‘
کاشف عباسی نے مزید بتایا کہ ملزمہ دلہن نے ملزم کی مکمل مدد کرتے ہوئے تمام معلومات شیئر کیں اور مختلف نمبرز سے مقتول کی لوکیشن کے بارے میں بتایا۔ رخصتی کے وقت جب دلہن اوردلہا گاڑی میں بیٹھ چکے تھے تو ملزم جلال نے مبینہ طور پردلہے عدنان کو فائرنگ کا نشانہ بنایا، جس کے نتیجے میں عدنان شدید زخمی ہو گیا اوراسپتال لے جاتے ہوئے دم توڑ دیا۔
پولیس کا کہنا ہے کہ گرفتار ملزمان نے پولیس کو ابتدائی بیان میں مذکورہ قتل کی بابت اپنی تمام منصوبہ بندی کے بارے میں بتا دیا ہے تاہم اس ضمن میں مزید تفتیش بھی جاری ہے۔
