تحریک انصاف کا جیل انتظامیہ کے خلاف توہین عدالت کی کارروائی کا فیصلہ

پاکستان تحریک انصاف کی کور کمیٹی کا اجلاس ہوا ہے جس میں چیئرمین پی ٹی آئی عمران خان کے خلاف مقدمات اور عدالتی کارروائیوں کا جائزہ لیا گیا۔

’عدالتی اجازت کے باوجود مختلف کارکنان اور ذمہ داران کو چیئرمین عمران خان سے ملاقات کی اجازت نہ دیے جانے کی شدید مذمت کرتے ہوئے جیل انتظامیہ کے خلاف توہینِ عدالت کی کارروائی کے آغاز کی منظوری دی گئی ہے‘۔

کور کمیٹی نے چیئرمین پی ٹی آئی عمران خان کو امتیازی سلوک اور انتقام کا نشانہ بنائے جانے کے خلاف جامع حکمت عملی تیار کی۔

انتخابات کے التوا کی سوچی سمجھی سازش سے بخوبی واقف ہیں، پی ٹی آئی

’جمہوریت اور سیاسی عمل کے وحشیانہ قتل میں عدلیہ کی خاموش معاونت تحریک انصاف کے بجائے دستور کے تارو پود بکھیرنے کا سبب بن رہی ہے‘۔

کور کمیٹی نے کہاکہ اغوا برائے بیان کا مکروہ دھندا چلانے اور سیاست و جمہوریت کی حرمت پامال کرنے والے پاکستان کو زوال اور انحطاط کی جانب دھکیل رہے ہیں۔

کورکمیٹی کے اجلاس میں عام انتخابات کو اعلان کردہ تاریخ سے دور دھکیلنے کی منظّم کوششوں کا بھی جائزہ لیا گیا۔

کور کمیٹی نے کہاکہ مختلف حلقوں کی جانب سے انتخابات کے التوا کی سوچی سمجھی مہم کے اغراض و اہداف سے بخوبی واقف ہیں۔ انتخابات کے آزادانہ، منصفانہ اور شفاف انعقاد میں مزید ایک روز کی تاخیر بھی برداشت نہیں کریں گے۔

سپریم کورٹ 8 فروری کو انتخابات کا انعقاد پتھر پر لکیر قرار دے چکی

پی ٹی آئی کور کمیٹی کا کہنا تھا کہ عدالتِ عظمیٰ 8 فروری 2024 کو انتخابات کے انعقاد کو پتھر پر لکیر قرار دے چکی ہے، عدالت عظمیٰ التوا کی خفیہ و اعلانیہ کوششوں کا نوٹس لے۔

یہ بھی کہا گیا ہے کہ سپریم کورٹ قبل از انتخابات دھاندلی کے رواں سلسلے کا نوٹس لے اور 8 فروری 2024 کو دستور میں طے کیے گئے معیار کے مطابق انتخابات کا انعقاد یقینی بنائے۔

اس کے علاوہ چیئرمین پی ٹی آئی عمران خان کی باضابطہ منظوری سے 6 نئے اراکین کور کمیٹی میں شامل کیا گیا ہے۔ اجلاس میں کورکمیٹی کا حصہ بننے والے نئے اراکین کا خیرمقدم کیا گیا۔