بین الاقوامی خلائی اسٹیشن نے تقریباً ایک چوتھائی صدی سے انسانیت کے لیے ایک آؤٹ اسٹیشن کے طور پر کام کیا ہے لیکن اب اس کی مدت حیات ختم ہونے کو ہے اس لیے اب امریکی خلائی ایجنسی ناسا اسے تباہ کرنے کا منصوبہ تیار کر رہا ہے۔
آئی ایس ایس کا خاتمہ سنہ 2030 میں ہوجائے گا۔ اسے بنانے میں 150 ارب ڈالر کی لاگت آئی تھی۔ ناسا، کینیڈا کی خلائی ایجنسی اور یورپی خلائی ایجنسی نے سنہ 2030 تک اسے چلانے کا عہد کیا ہے جب کہ روسی خلائی ایجنسی نے سنہ 2028 تک اس خلائی اسٹیشن کے لیے کام کرنے کا فیصلہ کیا ہے۔
ناسا اس 358 فٹ لمبے اور 239 فٹ چوڑے خلائی اسٹیشن کو ڈی آربٹ کرنے کی غرض سے اسے کھینچنے کے لیے ایک خلائی جہاز بھیجنے کا ارادہ رکھتا ہے تاکہ اسے بحرالکاہل میں پھینک دیا جائے اور اس تمام عمل پر ناسا کے لگائے گئے تخمینے کے مطابق ایک ارب ڈالر صرف ہوں گے۔
اگرچہ اس خلائی اسٹیشن کو کینیڈا، جاپان اور یورپ بھی سپورٹ کرتا ہے لیکن یہ بنیادی طور پر امریکا اور روس کی تخلیق ہے اور اہم بات یہ ہے کہ یہ ان چند شعبوں میں سے ایک ہے جہاں دونوں سپر پاورز نے انتہائی خراب تعلقات کے ادوار میں بھی تعاون جاری رکھا۔
قبل ازیں ناسا نے کہا تھا کہ خلائی اسٹیشن کو ختم کرنے کے لیے بہت سے روسی خلائی جہاز مل کر کام کر سکتے ہیں لیکن یہ خاصا مشکل کام ہوتا ہے کیونکہ اس مقصد کے لے متعدد خلائی جہازوں کو مربوط کرنے میں دشواری کا سامنا کرنا پڑتا ہے اور یہ ایک بڑا چیلنج ہوتا۔
لیکن یوکرین پر روس کے حملے کے بعد حالات خراب ہوتے جا رہے ہیں اور بین الاقوامی خلائی اسٹیشن کے معاملے میں بھی روس اور امریکا کے باہمی تعاون کا امکان نہ ہونے کے برابر لگتا ہے لہٰذا ان تمام عوامل کے باعث اب ناسا کو آئی ایس ایس کی ڈی آربٹںگ کے لیے ایک ٹگ وہیکل تیار کرنا ہوگا جس پر مجموعی طور پرایک ارب ڈالر لاگت آنے کی توقع ہے۔ اس مقصد کے لیے خلائی ایجنسی نے مالی سال 2024 کے لیے 18 کروڑ ڈالر مختص کرنے کی درخواست کی ہے کام کا آغاز کیا جاسکے۔
اصولی طور پر تو بین الاقوامی خلائی اسٹیشن کو ختم کرنا پانچوں (امریکا، روس، جاپان، کینیڈا اور یورپ) کی مشترکہ ذمہ داری ہے لیکن لگتا ہے کہ یہ خلائی ٹاسک امریکا ہی سرانجام دے گا۔
