احتساب عدالت لاہور نے آشیانہ ہاؤسنگ کیس میں سابق وزیراعظم شہباز شریف سمیت دیگر کو بری کرنے کا تفصیلی فیصلہ جاری کردیا۔
احتساب عدالت لاہور کے جج ملک علی ذوالقرنین نے آشیانہ ہاؤنگ کیس میں سابق وزیر اعظم شہباز شریف سمیت دیگر کو بری کرنے کا تحریری فیصلہ جاری کیا ہے، فیصلہ 59 صفحات پر مشتمل ہے۔
تحریری فیصلے میں کہا گیا تھا کہ آشیانہ ہاؤسنگ ریفرنس میں لگائے گئے الزامات انتہائی مشکوک تھے، ملزمان کے خلاف الزامات ثابت ہونے کا کوئی امکان موجود نہیں ہے، شہباز شریف سمیت دیگر کی بریت کی درخواستوں کو منظور کیا جاتا ہے، عدالت شہباز شریف سمیت دیگر کو ان الزامات سے بری کرتی ہے۔
مزید پڑھیں
فیصلے میں کہا گیا ہے کہ احد خان چیمہ نے چیئرمین نیب کو جولائی 2022 میں ری انوسٹی گیشن کی درخواست دی، سپلیمنٹری رپورٹ کے مطابق یہ ریفرنس کسی بھی ملزم کے خلاف ٹرائل کا نہیں ہے، سپلیمنٹری رپورٹ کے مطابق اس پروجیکٹ میں حکومتی خزانے کو نقصان نہیں پہنچا۔
عدالت نے اپنے فیصلے میں کہا ہے کہ سپلیمنٹری رپورٹ کے مطابق کسی بھی ملزم کے خلاف الزامات ثابت نہیں ہوئے، اس ریفرنس میں عدالت پراسکیوشن کا کنڈکٹ نظر انداز نہیں کرسکتی، اس فیصلے کی کاپی ڈپٹی پراسیکیوٹر جنرل نیب لاہور کو ارسال کی جائے۔
فیصلے میں کہا گیا ہے کہ گواہ عارف مجید کے بیان کے مطابق سابق ڈی جی نیب نے شہباز شریف کے خلاف بیان دینے کے لیے انہیں کہا، انہوں نے سابق ڈی جی نیب کو شہباز شریف کے خلاف بیان دینے سے انکار کیا۔
واضح رہے کہ آشیانہ ہاؤسنگ کیس میں احتساب عدالت لاہور نے 18 نومبر کو سابق وزیر اعظم شہباز شریف اور دیگر کو بری کرنے کا حکم جاری کیا تھا، اس کیس کا تحریری فیصلہ آج جاری کیا گیا ہے۔
