اسرائیلی فوج کے چیف آف اسٹاف لیفٹیننٹ جنرل ہرزی ہالوی نے کہا ہے کہ جنگ بندی کا وقت ختم ہونے کے بعد اسرائیلی فوج ایک نئے عزم کے ساتھ واپس آئے گی۔
غیر ملکی میڈیا کے مطابق اپنے ایک بیان میں اسرائیلی کمانڈر نے کہا کہ تمام یرغمالیوں کی رہائی تک ہم جنگ جاری رکھیں گے اور حماس کو مکمل ختم کرنے کے لیے اپنی کارروائیاں کریں گے۔
مزید پڑھیں
حماس نے مزید 17 یرغمالی رہا کر دیے
دوسری جانب اسرائیل اور فلسطین کی مزاحمتی تنظیم حماس کے درمیان جنگ بندی معاہدے کے تیسرے روز حماس کی جانب سے مزید 17 یرغمالیوں کو رہا کر دیا گیا ہے۔
غیرملکی میڈیا رپورٹس کے مطابق اتوار کو حماس کی جانب سے رہا کیے گئے یرغمالیوں کو غزہ سے باہر منتقل کیا گیا۔ ان میں سے کچھ افراد کو براہِ راست اسرائیل کے حوالے کیا گیا ہے جبکہ کچھ مصر کے راستے سے روانہ ہوئے۔
دوطرفہ معاہدے کے مطابق آج اسرائیل کی جانب سے بھی 39 فلسطینی قیدیوں کو رہا کیا جانا تھا۔
اسرائیل اور حماس کے درمیان 4 روزہ جنگ بندی کا آخری روز پیر کو ہو گا اور کل قیدیوں کا چوتھا تبادلہ متوقع ہے، معاہدے کے مطابق حماس مجموعی طور پر 50 یرغمالیوں کو رہا کرے گا جبکہ فلسطین کی جانب سے 150 قیدی واپس کیے جائیں گے۔
اِدھر امریکا اور قطر کی جانب سے کوشش کی جا رہی ہے کہ جنگ بندی میں مزید توسیع کی جائے۔
واضح رہے کہ 7 اکتوبر کو حماس کی جانب سے اسرائیل کے خلاف کیے گئے آپریشن کے بعد سے اسرائیل نے غزہ پر بمباری کا سلسلہ شروع کیا تھا اور اب تک مجموعی طور پر 15 ہزار کے قریب فلسطینی شہید ہو چکے ہیں جن میں بچوں اور خواتین کی بھی بڑی تعداد شامل ہے۔
اسرائیلی جیلوں میں انتقال کرنے والے فلسطینیوں کے ساتھ انسانیت سوز سلوک کا انکشاف
اِدھر الجزیرہ نیوز نے انکشاف کیا ہے کہ اسرائیلی جیلوں میں قید کے دوران انتقال کرنے والوں کی میتوں کو باقی سزا پوری کرنے کے لیے ریفریجریٹر میں رکھا جاتا ہے۔
اسرائیلی جیلوں میں قید کاٹنے والے فلسطینیوں کے حقوق کے لیے کام کرنے والے سماجی کارکن نے بتایا ہے کہ اب تک 398 فلسطینیوں کا اسرائیلیوں جیلوں میں انتقال ہوا ہے۔
Israel makes those imprisoned serve their full sentence in prison even if they’re dead…
142 Palestinians that have died in prison (mostly children) are kept in refrigerators as a form of collective punishment and psychological torture against their families. pic.twitter.com/uHB9PjSoSw
— Pelham (@Resist_05) November 25, 2023
انہوں نے بتایا کہ حالیہ عرصے میں 142 فلسطینیوں کا اسرائیلی جیلوں میں انتقال ہوا ہے جن میں نوجوان اور بچے بھی شامل ہیں مگر ان کی لاشیں ریفریجریٹر میں رکھی گئی ہیں۔
یہ بھی یاد رہے کہ اسرائیل فلسطین میں جنگی جرائم کا مرتکب ہو رہا ہے مگر مہذب دنیا کے کانوں پر جوں تک نہیں رینگ رہی، جنیوا کنونشن کے تحت جنگ کرنے والے فریقین کو پابند کیا گیا ہے کہ مخالفین کی لاشوں کی باعزت طریقے سے تدفین کی جائے گی۔
