جنوبی وزیرستان میں سیکیورٹی فورسز اور دہشتگردوں کے درمیان فائرنگ کا تبادلہ ہوا ہے جس کے نتیجے میں 8 دہشتگرد ہلاک ہو گئے ہیں۔
پاک فوج کے شعبہ تعلقات عامہ (آئی ایس پی آر) کے مطابق جنوبی وزیرستان کے علاقے سراروغہ میں سیکیورٹی فورسز نے خفیہ اطلاعات کی بنیاد پر آپریشن کیا اور اس دوران فائرنگ کا تبادلہ ہو گیا جس کے نتیجہ میں 8 دہشتگرد ہلاک ہو گئے۔
مزید پڑھیں
آئی ایس پی آر نے بتایا کہ دہشتگردوں کے قبضے سے اسلحہ اور دھماکہ خیز مواد برآمد ہواہے، مارے گئے دہشتگرد سیکیورٹی فورسز اور شہریوں کے خلاف کارروائیوں میں ملوث تھے۔
ترجمان آئی ایس پی آر نے بتایا کہ دہشتگردوں کے خاتمے لیے علاقے میں سرچ آپریشن جاری ہے۔ سیکیورٹی فورسز ملک سے دہشتگردی کے خاتمے کے لیے پُر عزم ہیں۔
واضح رہے کہ کچھ عرصے سے ملک میں دہشتگردوں نے پھر سے سر اٹھا لیا ہے جن کو کچلنے کے لیے سیکیورٹی فورسز کی جانب سے بھرپور کارروائیاں کی جا رہی ہیں۔
افغانستان سے ہونے والی دہشتگردی پر بھی پاکستان کی جانب سے دوٹوک موقف اختیار کرتے ہوئے کہا گیا ہے کہ طالبان حکومت ایسے عناصر کے خلاف کارروائی کرے یا انہیں پاکستان کے حوالے کرے۔
