دوست کی جگہ ڈرائیونگ ٹیسٹ دینے والا دھرلیا گیا۔ امیدوار نے ڈرائیونگ ٹیسٹ پاس کرنے کے لیے اپنے شناختی کارڈ پر دوست کو بھیج دیا تھا۔ تاہم انسپیکٹر عمران فراز نے دوست کی جگہ ٹیسٹ دینے والے دوست کو رنگے ہاتھوں پکڑ لیا۔
لاہور ٹریفک پولیس کے مطابق محمد فرخ اعجاز بٹ نامی امیدوار نے اپنے دوست عثمان علی کو ٹیسٹ کے لیے اپلائی کروایا۔ ٹیسٹ کے دوران مشکوک حرکات وسکنات پر ملزم کی بائیومیٹرک کروائی گئی، بائیو میٹرک شناختی کارڈ سے میچ نہیں ہوئی، اس پر دونوں دوستوں کو گرفتار کرلیا گیا۔
ملزمان کے خلاف تھانہ گلبرگ میں مقدمہ درج کر لیا گیا ہے۔ چیف ٹریفک آفیسر (سی ٹی او) لاہور نے بروقت کارروائی پر انچارج لبرٹی ٹریفک سینٹر انسپیکٹر عمران فرازاور ساتھی وارڈن کو شاباش دی ہے۔
