ٹھوس شواہد نہ ہونے پر لیفٹیننٹ جنرل ریٹائرڈ امجد شعیب کو بری کر دیا گیا

لیفٹیننٹ جنرل ریٹائرڈ امجد شعیب کو عوام کو اُکسانے کے مقدمے سے بری کر دیا گیا ہے۔ اسلام آباد کی مقامی عدالت نے فوری رہائی کے احکامات جاری کر دیئے۔

ڈسٹرکٹ اینڈ سیشن جج طاہر عباس سپرا نے کیس کی سماعت کی۔ امجد شعیب کے وکیل نے عدالت کے سامنے مؤقف اپنایا کہ ان کے موکل کے خلاف جو مقدمہ درج کیا گیا وہ قانون کی نظر میں درست نہیں۔

عدالت نے تمام فریقین کے دلائل سننے کے بعد آج ہی فیصلہ محفوظ کیا تھا۔ جسے بعد میں سناتے ہوئے عدالت نے امجد شعیب کو مقدمے سے بری کر دیا۔

عدالت نے تحریری فیصلے میں قرار دیا کہ ایسے کوئی شواہد یا مواد پیش نہیں کیا گیا جو کسی جرم سے امجد شعیب کا تعلق جوڑے۔ لہٰذا انہیں مقدمے سے بری کیا جاتا ہے۔ اگر وہ کسی اور کیس میں مطلوب نہیں تو انہیں فوری رہا کیا جائے۔

مقدمہ اور گرفتاری

واضح رہے کہ اسلام آباد پولیس نے لیفٹیننٹ جنرل (ر) امجد شعیب کو 27 فروری علیٰ الصبح ان کی رہائش گاہ سے گرفتار کیا تھا۔ ان پر عوام کو اداروں کے خلاف اکسانے کا الزام تھا۔

امجد شعیب کے خلاف مقدمہ تھانا رمنا اسلام آباد میں مجسٹریٹ اویس خان کی مدعیت میں درج کیا گیا تھا۔ مقدے میں عوام کو اکسانے کی دفعات 153 اے اور 505 شامل کی گئی تھیں۔

مقدمے کے متن میں کہا گیا تھا کہ امجد شعیب نے ٹی وی پروگرام میں عوام کو بغاوت پر اکسایا۔ ملزم نے اپنے بیان میں سرکاری ملازمین اور اپوزیشن کو سرکاری قانونی فرائض سے روکنے پر اکسایا تھا۔

مقدمے میں یہ بھی کہا گیا کہ ’ان کے بیان سے ملک میں بے چینی، بد امنی اور انتشار پیدا کرنے اور حکومت اور حزبِ اختلاف میں دشمنی، اشتعال انگیزی اور نفرت پھیلانے کی کوشش بھی کی گئی۔ ملزم کی جانب سے سرکاری ملازمین میں نفرت پیدا کرکے ملک کمزور کرنے کی سازش کی گئی۔

مقدمہ کی عدالتی کارروائی

لیفٹیننٹ جنرل (ر) امجد شعیب کو 28 فروری کو ڈسٹرکٹ اینڈ سیشن کورٹ اسلام آباد میں جوڈیشل مجسٹریٹ عباس شاہ کی عدالت میں پیش کیا گیا تھا۔

پراسیکیوشن کی جانب سے عدالت سے امجد شعیب کے 7 روزہ جسمانی ریمانڈ کی استدعا کی تھی۔ تاہم عدالت نے امجد شعیب کو 3 روزہ جسمانی ریمانڈ پر پولیس کے حوالے کر دیا تھا۔

حوالات کی تصویر سوشل میڈیا پر وائرل

لیفٹیننٹ جنرل ریٹائرڈ امجد شعیب کی دوران حراست ایک تصویر سوشل میڈیا پر وائرل ہوئی۔ دیکھا جا سکتا ہے کہ امجد شعیب حوالات میں ہاتھ باندھے کھڑے ہوئے ہیں۔

سوشل میڈیا پر صارفین کی جانب سے انواع و اقسام کے تبصرے اور تجزیے کیے گئے ۔ چیئرمین پی ٹی آئی عمران خان نے بھی تصویر ٹوئٹر پر شیئر کی۔

I feel embarrassed as a Pakistani to witness the depths we have sunk to thanks to this imported regime of a cabal of crooks & their handlers. In desperation to cling to power & muzzle all dissenting voices, they have jailed a respected, patriotic Pakistani on sedition charges. pic.twitter.com/YCo9F371vU

— Imran Khan (@ImranKhanPTI) March 2, 2023

عمران خان نے اپنے پیغام میں لکھا ’اقتدار سے چمٹے رہنےکی خواہش اور اختلافِ رائے کا گلا گھونٹنے کے لیے معزز اور محبِ وطن پاکستانی پر بغاوت کا الزام تھوپ کر اسے زندان میں ڈال دیا ہے۔